Lunedì, 26 Ottobre 2026 - 18:19 Comunicato 3204

Abegètt di vorsitzarung von Vorarlberg dar Bavìara. Vor earst in trèff izta khent geredet von zuarkhemmen vodar bichtschaft un von traditzionàln arbatn von alpinar raum
Dar vorsitzar Fugatti in trèff von Schaffar von Govèrno vo Arge Alp atz Bregenz

Traduzione in cimbro

[Cimbro] ’Z iztase gehaltet an vraita atz 23 von bimmat atz Bregenz, in Österraich, dar 57tzege konfréntz von Schaffar von Govèrne vo Arge Alp, boda iz khent abegètt di vorsitzarung von lånt Vorarlberg dar Bavìara, vor earst izta khent geredet baz zo tüana vürzovüara in alpinar Raum, legante pittnåndar alle di lentar boda soin toal vodar arbat Kamòuschaft. Ma saitze augehaltet zo reda übar dar bichtschaft un di traditzionàln arbatn von alpinar raum, übarhaup vor bazta ågeat dar schützung vodar umbèlt un bia auzohalta di låntbichtschaft von pèrng. In trèff hatta genump toal dar vorsitzar vodar autonome Provìntz vo Tria Maurizio Fugatti. “Bar håm untarstricht in tèma von bazzar, zo khöda ke ’z iz noateg azta di Euròpa gea vürsnen untarzolega gèlt helvante mearar in lentar, azpe bar håm getånt biar in trentino pinn PNRR, untarlegante schiar 110 mildjü vor di aquedotte – asó hatta khött dar vorsitzar – ombrómm in di zaitn vodar dürr di lentar von pèrng, azpez iz djüst, gem ’z bazzar in sèlln vodar ebene, ma ’z iz grüntlich håm modèrnege, naüge impiånte, pitt hoacha teknolodjì. Bar håm dena geredet von tèma von groazan vlaischvrèzzar: bölf un perdar, boda in Trentino, ma nèt lai da, schedegen di låntbichtschaft von pèrng. Di Euròpa mocht bèksln tritt un Arge Alp o mocht rivan zo haba soi positziong aftz disan tèma.
La Conferenza dei Capi di Governo Arge Alp a Bregenz [ Archivio Ufficio Stampa PAT]

’Z håmda genump toal in trèff zbisnen in åndarn dar vorsitzar von Vorarlberg Markus Wallner, dar hauplåntsmånn von Tiról Anton Mattle, dar vorsitzar vodar autonome Provìntz vo Poatzan Arno Kompatscher (dar Südtiról bart vüarn di arbat kamòuschaft von djar 2028 vort) funktzionàrdje un referentn von lentar vo Arge Alp; vor da autonome Provìntz vo Tria iztada gest di diridjénten von Dianst vor di zungmindarhaitn un auzantn sachandarn Elisabetta Sovilla.
Auz pan mòrgan soinda khent ågenump mearare sachandarn, zbisnen disan daz sèll aftaz zuarkhemmen vodar låntbichtschaft afte pèrng: di kamòuschaft Arge Alp, defatte, bill stercharn, vürvüarn un schützan mearar di alpinar lentar un bazta khint prodürt in dise lentar sèlbart. Darzuar izta khent ågenump a risoluziong übar bazta ågeat in bazzar, gegruntet aftz bichtege sachandarn boda mochan khemmen pellar baz åndre: garantìrn qualitét un soin sichar zo haba ’z bazzar, ma übarhaup difendarn daz öffentlesche bazzar sterchrante di mittarbat zbisnen autonome Provìntzan, Rdjongen un Kantöü vo Arge Alp, untarstraichante solidarietét un nempe, rettante ’z bazzar zoa az nèt khemm auzgevrèzzt. Ånemmante di risolutziong übar da enrdjètege umbèkslom, bölltma anvétze gem an konkrètegen schütz dar enerdjètege sèlbstendeg von kamòuschaftn, bestetegante in strategesche ruòl von alpinar raum azpe motor vodar vornaügarung un auhaltom.

Zbisnen in prodjèke vorgelekk von Trentino izta khent gezoaget di initziatìf boda vürlekk in koordinamént von Dianst vor di Pèch vo Pèrge: “Sensibilizarn di laüt bia zo komportarase in plètz boda mage vürkhemmen a luvióng” vürgevüart pittnåndar pittar autonome Provìntz vo Poatzan, pittar Redjong Lombardia, pinn Lånt Tiról, pitt Saltzburg un Kantòu Tessin. Dar prodjèkt lekk vür di operatìf vüar linee boda bartn khemmen gezoaget pròpio ka Tria in bimmat von djar boda khint (da di meldung boda iz khent gezoaget dar prodjèkt).

Darzuar nå in spruch "Arge Alp meets Eusalp" iztase gehaltet o a trèff von Schaffar von Govèrne von lentar vo Arge Alp un di spitz politke vodar européan stratedjìa von Alpinar Redjongen (EUSALP),  darnå in djarege forum un da Djeneràl Versåmmelung bodase soin gest gehaltet atz Lindau übar bichtschft, mobilitét, vornaügarung un artifitziàl inteligentz.

Arge Alp in an arbat kamòuschaft augelekk atz 12 von bimmat von djar 1972 atz  Mösern, in Tiról, pinn zil z’arbata übar tème boda ågian alln un boda innvånk schiar 26 mildjü laüt. ’Z nemmnda toal in Arge Alp, ’z Taütschlånt pinn Frai Stato vodar Bavìara, ’z Österraich pinn Länder Vorarlberg, Tiról un Saltzburg, ’z Beleschlånt pinn zboa autonome Provintzan vo Poatzan un Tria un pittar Redjong Lombardia, di Svaitz pinn Kantöü Graubünden, Saknt Gallen un Tessin. Allz baztada iz  zo bizza venntmaz atz www.argealp.org.

Foto un film von Prèss Åmt

Download pildar un intervista da

Übarsetzt von Schaltarle vor di zung von Toalkamou vodar Zimbar Hoachebene

(cdt)


Immagini