[Cimbro] ’Z hatta ågeheft in Moggioli Haus, setz von informatziong un koordinamént Åmt von Euregio Tiról-Südtiról-Trentino, da viarte editziong von “Erta von Euregio”. In earst trèff von 2026 hattma geredet übar dar bèlt von schualn, pinn zil nidarzolega naüge didaktìk stratedjìan vürzovüara statt edukatziong un darzuar bia zo lirna da taütsch zung un bia zo arbata pittnåndar übar di grentzan. Dar trèff iz khent augelekk pittnåndar von Euregio, pinn Dipartiment Istrutziong vodar autonome Provìntz vo Tria un IPRASE, dar hatt gelekk panåndar maistre vodar untarschual un vodar mittlschual. In trèff håmda genump toal dar provintziàl asesór zo macha khennen di Autonomì Simone Marchiori, boda hatt gevüart in gruaz vodar asesören Francesca Gerosa. “Vüarn in Euregio in di schualn iz ummaz von earstn sachandarn zo tüana: ’z bill soin gemuant boroatn di naüng djeneratziongen zo leba pittnåndar, mittzoarbata un zo redase zbisnen in lentar übar di grentzan. Vo da heftma å zo macha aubaksan di zuarkhemmane, åhevante pròpio von djungen un von sèll soin guat von ünsarn lentar zo kreschra pittnåndar, nèt auz alumma” asó hatta khött dar Marchiori. ’Z iztada o gest dar schual sovraintedént vodar autonome Provìntz vo Tria, Giuseppe Rizza, boda hatt khött: “Di prodjèkte von Euregio pezzarn daz sèll boda khint gètt von trentinar schualn un darzuar stercharnsa an européan auzseng. Konfrontàrn di schualn sistème, di arbat von maistre, haltn dakunt di meararn zungen un innvüarn naüge didaktìke, allz ditza vüart zo maga håm an pezzarn, öffege un stecharn edukatìf sistèm”. Dar Rizzi hatt darzuar gevüart un gètt vèrt in sèll boda hatt khött di asesóren Gerosa, khödante ke, azpe si, er o iz in gåntzan dakòrdo pinn ziln boden iz gètt disar prodjèkt. Di Gerosa, defàtte, redante aftna åndra sait, hatt gehatt khött übar disan prodjèkt: “Dar Euregio vor ünsarne schualn iz a konkrètega oportunitét boda gitt zuar zo stechra di zung kompeténtzan, da statt edukatziong un gitt zuar in Lentar zo khennese pezzar tra de se. Di didaktìk esperientzan gemacht übar di grentzan håm an gåntz groazan vèrt zo macha krescharn di studjént, machante khennen pezzar di Eurodredjong drinn in an internatzionalegen kontèkst.