En Garait gester vria der istituzional trèff envire trong van Autoritet van sprochminderhaitn
Bersntoler sprochminderhait, Fugatti "Òcht ont stitzn de kultur ont de ear va de doi gamoa’schòft"
Traduzione in mòcheno
[Mòcheno] Gester vria kan sol en Garait, an trèff zbischn de istituzionaln derstelltn ont de lokal gamoa’schòft envire trong va de Autoritet van sprochminderhait ont van Provinzalrot. An moment ver za klòffen se aus ont vertiavn de haup neat va de bersntoler gamoa’schòft ont asou zòmmvinnen strategi ver za gem gilt en de sproch, en de kultur ont en de lòntschòft.
En trèff hom toalganommen der president va de Autonome Provinz va Trea’t Maurizio Fugatti, zòmm pet de provinzal ont regional haupstituzionen, abia der president van Provinzalrot Claudio Soini, der regional assessor Luca Guglielmi, de provinzal consiliarn Walter Kaswalder, Francesca Parolari, Francesco Valduga ont de amministratorn van lònt, zbischn de beiln, der pirgermoaster va Palai en Bersntol Franco Moar, der pirgermoaster va Vlarotz Lorenzo Moltrer, der pirgermoaster va Garait Luca Puecher ont der president va de Tolgamoa’schòft Hoa Valzegu’ ont Bersntol Andrea Fontanari.
Der president Fugatti hòt se padonkt pet de Autoritet van sprochminderhaitn ont pet òlla de istituzional derselltn ver za sai’ kemmen inngalònt: “I hòn gabellt toalnemmen bavai i glab as vinnen se ver za klòffen iber der tema van sprochminderhaitn ist runt bichte ver en storische gilt ont ver en bèrt as de hom ver de inser Autonomi. De inser òcht miast òlbe hoa plaim durch en stitzn de kultur ont bèrt gem en de sprochminderhaitn. I padonk de gamoa’amministratorn ver de òrbetn as de hom envire trong, der doi va hait ist an moment va oa’nekait as laichtert za tschernen de sòchen za tea’ ver en lònt”.
[
Juliet Astafan_Archivio Ufficio Stampa PAT]
"Bail de vouder legislatur de Provinzaljunta hòt tschèrlt Palai en Bersntol abia Gamoa’ as kriak zboas’k milionen ver en projekt Derver PNRR - hòt nou unterstrichn Fugatti - Ber hom gabellt kreft gem en an ausòndra birklekait, ober i hòn gearn tsechen as de trentinische gamoa’schòft hòt guat u’ganommen de doi tschèrl, bavai s bill song as men tschbinnt as bichte ist bèrt gem en de doi gamoa’schòft. Ber hom aa gabellt stòrch gem de zuazoln ver de infrastrukturn ver za meing se gahasseger ont desterer meivern umen tol: der doi trèff bill sai’ an derkennen de groas òrbet as sai’ noch za tea’ de amministrazionen derzua en de Autoritet van sprochminderhaitn”, hòt er garift za song der president.
S hon nou toalganommen en trèff de president van Autoritet van sprochminderhait Katia Vasselai, de viareren van Dinst ver de Sprochminderhaitn ont ausbendegen nètzn PAT Elisabetta Sovilla, de viarer van regionalstrukturn, zòmm pet de derstelltn van Bersntoler kulturinstitut - solderearstn de president Patrizia Bocher ont de viarerern Claudia Marchesoni - ont de Zòmmòrbeter en plòtz va de Viareren van Òllgamoa’schual Pergine 1, Marina Lasta.
