“L'inteligenza artifizièla la pel vegnir touta su con n gran cruzie o co na dreta gaissa. La moda miora la é tel mez”, l à declarà Kompatscher. ”L'AI la pel miorèr noscia vita e dèr soluzions ai problemes che amò no cognoscion. N comportament out al ‘vedaron’, aboncont, l pel esser e risech ajache demò la logica de l'AI no la amet compromisc. Cognon meter ju la linees de guida chières e no perder mai de tegnir sot eie l fator uman”.

L president Fugatti te so salut l à sotrissà che a Alpbach "l vegn rejonà de storia e de davegnir, l vegn rejonà de
tradizion e de inovazion e la tematiches toutes dant les sotrissea l'unità anter i trei teritories". A propojit de la tematica portèda dant te la scontrèda de anché l president l à ence comentà: “Desche per ogne autra neva, l’inteligenza artifizièla la se porta do dubies desvalives, ocajions e risesc, e per la interpretèr al miec ogneun de nos
- sentadins, aziendes, aministrazions publiches – l é chiamà a la cognoscer e a se fèr na coscienza. Tel Trentin la enrescida su l’AI la é peèda via acà carant’egn, deleite de na gran scometuda portèda dant anchecondì da la Fondazion Bruno Kessler. Tel temp la se à concretisà te soluzions prateghes al servije del mond agricol e
produtif. Sono segur donca che nesc teritories, forc de sia competenzes, i sarà bogn de tor su la ocajions che chesta neva endesfida la met dant a l’umanità e i podarà ge vardèr al davegnir co neva gaissa".

L capitan Mattle l à recordà che “per ruèr a na doura segura de l'AI se cogn tegnir cont de costions etiches e sozièles e veder ite i risesc potenzièi. Ma cognon ence aer l coraje de tor su chesta neva tecnologia, che la è destinèda a restèr e a no se desfantèr, e a la sfrutèr a nosc ben”.

Tel dì del Tirol l è peà via ence l EuregioLab: te chisc dis che vegn na ventina de esperc i se
Confrontarà en cont de la doura de l’AI te l'Euregio.

Fotoservije e imagines a cura de Euregio

Download imagines e intervistes chiò

Traduzion di Servijes Linguistics e Culturèi del Comun general de Fascia