“Da artifitziàl Inteligentz mage soin ågenump pitt groazan ångst odar pitt groaza pegaistarung. Daz peste steat azpe hèrta in di mitte”, asó hatta khött dar Kompatscher. “AI mage pezzarn ünsar lem un auzrün sachandarn bobar njånka nonet khennen. Però stian lai zo paita un khön steabar z’sega bazta vürkhint, magat soin perikolosat ombrómm AI gitt nèt zuar auzpezzarung von lest momént. Ma mocht auzmachan hoatre regln un nia lazzan gian ar a bege in mentschliche faktor”.
Dar vorsitzar Fugatti grüazante hatt khött ke atz Alpbach “redetma vo stòrdja un futuro, ma redet vo traditziong un vornaügarung un dise tème zoang di pintom boda iz zbisnen in drai lentar”. Vor bazta ågeat in tèma boda iz khent auzgeredet in trèff vo haüt dar vorsitzar hatt no khött: “Azpe vor alle di naüng sachandarn AI o trakk oportunitét un riskie un zo vorstiana pezzar aniaglaz vo üs – saiz pürgar, firme, odar öffentleschan vüarom – iz gerüaft zo khenna bia ’z stianda di sachandarn un zo bizza bazzez iz djüst disar naüge instrumént. In Trentino hattma ågeheft nåzosüacha übar AI no vor viartzekh djar, drinn in a groaza bett boda haüt khint vürgetrakk vodar Stiftung Bruno Kessler, un in di zait soinda khent gevuntet konkrètege soluziotziongen vor di låntbichtscahft un vor vil åndarz. Asó pinne sichar ke ünsarne lentar boda sa håm a groaza kompeténtz, bartn soin guat zo nemma disa oportunitét boda di AI trakk nå un schaung zuar in futuro pitt naüga pegaistarung”.
Dar hauplåntsmånn Mattle hatt gedenkht ke “zo macha az saibe sichar nüzan AI mochtma haltn kunt vo mearare questiongen ètische un sotziàln un vorstian bele ’z magatnz soin di riskie. Ma bar mochan håm in koradjo zo nütza disa naüge teknolodjì boda bart sichar stian in di djardar boda khemmen un nützanse zo haba guatz”.
Pinn Tage von Tiról hatta ågeheft EuregioLab: in di tang boda khemmen a zbuantzekh espèrte bartn drauren bia zo nütza AI in Euregio.
Foto un pildar von Euregio
Download pildar un interviste da
Übarsetzt von Schaltarle vor di zung von Toalkamou vodar Zimbar Hoachebene
