L é stat dat su aló da l’Apac i lurieres per comedèr l “Pent del Peles” su la Strèda Statèla 641 del Jouf de Fedaa, te Fascia. L cantier l g’é stat dat su a la firma Zampedri Lorenzo srl da Perjen, con n rebas del 6,673%, per n cost en dut de € 1.484.822,58 (spartì su te € 1.409.272,22 per lurieres e € 75.550,36 per agravies per la segureza). L é temp 180 dis da canche vegn consegnà l cantier per fenir su i lurieres.
“Se trata amò de n auter intervent – despiega l President de la Provinzia autonoma de Trent Maurizio Fugatti – che miorarà la segureza e la efizienza de la rei de la strèdes che l é sul tegnir de la Provinzia, soraldut de la strèda che coleea l Jouf de Fedaa e la Marmolèda. I intervenc pervedui i miorarà la stabilità e la segureza del viadot, comedan la pèrts danejèdes e l stravardan dal pericol de teremoc e de levines”.
Tel detai l apalt l perveit de mudèr fora la strutura zentrèla che l é anter un pilèster e l auter con una neva de acel e peton, de fèr su na “parèda” auta 5 metres per stravardèr i auti che passa e de slarièr la strèda delaite del viadot da 6 a 7 metres. L é pervedù ence de renfonzèr duc e doi i pilèstres, metan ju micropèi.