Di Elisa Bertò hatt untarstricht ke ’z puach, hatt gemak khemmen gemacht ankunto dar arbat vo alln, an arbat boda hatt zuargètt zo maga ren vo argoméntn nèt soin dèstar pinn zil nèt zo smarìra di stòrdja vo aniaglaz von drai lentar ma zo venna ummana bodase darkhennt vo alle un bodase pintet. “Da trentinar vorsitzarung un bazta khint vürgelekk von Euregio sèlbart bill auzbetarn bazta khint getånt pitt prodjèkte boda ågian formatziong un edukatziong, vor daz sèll saibar drå z’arbata aftnan stòregen didjital atlånte, boda sik vorånavür di Stiftung Museo Storico un boda bart zoang afte kart di gehöarom un di stòrdje von drai lentar.
Dar schraibar hatt gedenkht ke ’z puach iz geschribet zo machase vorstian von laüt, un iz khent pensàrt daz earst vor di djungen, zo gebanen an auzseng bodase vüart zo schauga bait un nèt lai atz haüt azpe ’z vürkhint hèrta mearar alle tage vor di naüng djeneratziongen. An arbat gemacht, nèt zo bölla schaffan bia z’sega di sachandarn, ma “zo zoaga biavl sachandarn alle deferente ’z soinda”.
Asó azpe ma hatt sa khött in da naüge editziong di lesar bartn vennen an kapìtl afte “Euròpa hèrta nempar” pinn prodjèkte boda soin khent gemacht pittnåndar von Euregio Tiról-Südtiról-Trentino übar dar kultùr un vürzovüara di djungen, ma darzuar o aftz traspòrte, umbèlt, kraft un sviluppo. In zen djar, dar Euregio, boda iz gest khent augelekk an earstn azpe GECT ’z djar 2011, hatt vürgetrakk 350 prodjèkte. Zbisnen disan dar Festival von Djungen von Euregio, di gara vo redar Tour of Alps, in Euregio Family Pass, in Repòrt von Lavìn von Euregio, in Gedenkh Andreas Hofer in Mantua un di arbatn von 2021 afte Musee von Euregio.
’Z puach, pittn vorbort von Vorsitzar vodar autonome Provìntz vo Tria un von Euregio Maurizio Fugatti, von vorsitzar vodar autonome Provìntz vo Poatzan Arno Kompatscher, un von sèll boda sa iz gest hauplåntsmånn von Tiról Gunther Platter, mage khemmen gelest azpe e-Book o aftz disan link:
Übarsetzt von Schaltarle vor di zung von Toalkamou vodar Zimbar Hoachebene
(Traduzione a cura dello Sportello linguistico della Magnifica Comunità degli Altipiani Cimbri)
