Traduzione in cimbro
’Z iztase gevuntet atz Cavalese dar Rat von Kamöündar von Euregio
In trèff von Rat von kamöündar von Euregio bodase iz gehaltet atz Cavalese atz 21 von höbiat, Tage von Kamöündar 2023, izta khent ågenump a motziong vor an uantzega stratedjì kontro in bostriko. In sèll tage soindase gehaltet mearare trèff pinn zil zo arbata no mearar pittnåndar zbisnen in lentar.
Di motziong rüaft di vüarar vodar autonome Provìntz vo Tria un vodar autonome Provìntz vo Poatzan un von Land Tiról zo nemma initziativan auzolega stratedjìan alle pittnåndar boda gian übar di grentzan boda mang gian guat kontra in bostrico un darzuar bia zo hakha in balt un bia zo nütza ’z gehültz geschedeget.
“Daz bichte vo disan organ von GECT iz daz sèll zo maga machan prodjèkte boda gian garade zo pezzra ’z lem von pürgar. Helvan di vüarom von drai lentar zo reda pittnåndar un zo venna konkrètege solutziongen in problème disa iz sichar di natùr vodar ünsarn istitutziong” asó hatta khött di Elisa Bertò, djeneràl sekretardjo von Euregio.
Dar Rat von Kamöündar iz an konsultìf organ vodar Djunta von Gect Euregio, dar iz gemacht vo vüchtza laüt, vünve vor aniaglaz lånt un iz augelekk nå in zil zo nempra di pürgar in Euregio un asó khintar auzgelüsant vor bazta ågeat prodjèkte un mångln boda mang khemmen gelekk in progråmm von Euregio haltante kunt von sèll boda håm mångl di lentar pintante asó no mearar di Euroredjong.
In trèff vo Cavalese izta khent abegètt ’z klökkle von Rat von Kamöündar von Euregio zbisnen in vorsitzar von Trentinar Konsortzio von kamöündar Paride Gianmoena un dar vorsitzar von Konsortzio von kamöündar vo Südtiról Andreas Schatzer. A simbòlegar akt boda vürlekk ke in herbestmånat di vorstizarung von Euregio bart bèksln un von vorsitzar Maurizio Fugatti bartze pasàrn in vorsitzar Arno Kompatscher.
Foto von Press Åmt
Übarsetzt von Schaltarle vor di zung von Toalkamou vodar Zimbar Hoachebene
(cdt)
Immagini
