Foto vo auzseng, vo haüsar odar boda zoang da euroredjonàl kultùr: vor in kalandardjo 2024, dar Euregio Tiról-Südtiról-Trentino süacht di pestn pildar von drai lentar, durch a naüaga editziong von fotografege konkórs. Dar tèma iz dar sèll von stadjongen un von soin varm. ’Z mangda nemmen toal in konkórs di pürgar von Tiról, von Südtiról un von Trentino, schikhante di foto vor atz 3 von herbestmånat afte websait von Euregio. Di pildar boda bartn gebinnen bartn khemmen gelekk aftn kalandardjo boda bart khemmen gedrukht in zboa versiongen auzohenga dar maur un zo postàra aftn tisch.
“In di djar da groaz arbat un pasiong von toalnemmar hatt gemacht khemmen disan konkórs eppaz bichte vor ünsarne kamöüschaft: aniaglana foto zoaget daz schümma von ünsarn lentar un darzuar zoagetz in groaz vèrt vodar arbat boda khint gemacht übar di grentzan un da kultùral pintom von Euregio” asó khütta dar vorsitzar vodar autonome Provìntz vo Tria un von Euregio Maurizio Fugatti.
“Haür o vorspar in pürgar un pürgaren boda lem in di drai lentar zo zoaganaz soine pestn foto, boma mage seng daz schümma von ünsar gebit” asó hatta khött dar lånthaupsmånn von Tiról Anton Mattle.
“Dar fotografege konkórs un dar kalandardjo soin gånt asó garècht ke ’z izta nèt mångl zo khöda mearar. Di fotografe zoang asó garècht daz schümma vodar auzseng, vodar natùr, vodar kultùr un vodar arkitetùr von Tiról, von Südtiról un von Trentino, ke dar kalandardjo 2024 bart sichar gevalln in vil laüt von Euregio un nèt lai”, khütta dar vorsitzar vodar autonome Provìntz vo Poatzan, Arno Kompatscher.