Thomas Doss ist en 1996 en Linz augòngen ont hòt galeart, kan Konservatorium Bruckner, za spiln de posaune, za schraim liadler ont za viarn a kapelle, ont derno hòt der nou baiterstudiart kan Mozarteum va Salzburg, ka de Universitet va Musik va Wien ont kan Konservatorium va Maastricht. En 1987 der hòt gabungen der Konkurs ver Kapelleviarer va de “Wiener Kammerorchester” ont en jor derno der hòt u’gaheift abia viarer kan “Konzerthaus va Wien”. Pet 23 jor der ist auganommen kemmen va de Stòttsinfonikorkester va Quedlinburg abia jingeste kapelleviarer va Taitschlònt. De sai’ òrbet ist gamòcht va lirikòrbetn, kapelleòrbetn, kòmmermusik, koralòrbetn ont solistnòrbetn ont abia kompositor ver sinfonikorkester va plosstrumentn ont de kapelle va plaichplosstrumentn, Doss ist oa’n van mear tschuacht af de bèlt kemmen. Professor va kapelleviarer kan Konservatorium Claudio Monteverdi va Poazn van 2011 finz en 2016, Doss òrbetet nou òlbe abia richter ont der ist runt guat tsechen en bolten konkursn.

De stòttmusikkapelle va Wilten nimmp der nu’m van elteste kroas va Innsbruck, Wilten, as vinnt se en sud va de stòtt, unter en Bergisel, raich va gschicht ont tròchtn. S augea’jor va de kapelle ist dokumentiart en 1650 - semm de ist nou oa’na van kirchkapellen gamòcht en de sèll zait. Bail de pagreimes van Andreas Hofer, en 1823, s hòt lai 13 musiker gahòp, ober hait s hòt 65 lait as vrait hom ver de musik ont as de kemmen van an iata schòrt mentsch. Derno van zboate bèltkriag, de kapelle ist scheket groas kemmen zòmm pet en viarer Sepp Tanzer, as der sa kennen hòt gamòcht en gònze Osterraich ont en auslònt ont der hòt sa gabèckslt en a sinfonikorkester va plosstrumentn. Pet de Kapellmeister Michael Stern, Hans Toifl, Peter Kostner ont Raimund Walder, as viart de “Wiltener”sait en 2020, de stòttkapelle va Wilten ist kemmen an paispil ver de osterraiche musik ver plaichstrumentn. Auser en gaing bail naikaitn va de kirch oder va de gamoa’schòft, der langeskonzert (“Wilten Festival”) ont de “Vaierbèrke va musik ver plosstrumentn” zbischn de jarder sai’ de bichtestn momentn ver de doi groas sinfonikorkester va plosstrumentn.

Ibersetz gamòcht van Sprochtirl va de Tolgamoa'schòft Hoa Valzegu' ont Bersntol