Sarà na sera curiousa e golousa tel cher de la tradizion ladina più sćiantiva chela che l Museo Ladin de Fascia endreza per recordèr la usanzes e la superstizions che nesc veies vivea en vea de Pèsca Tofènia e che te Fascia les vegn zelebrèdes amò te vèlch cèsa. E donca te Majon di Fascegn, apontin la cèsa di ladins per ezelenza, chi che arà gust e voa de veder dal vif chisc rituèi podarà l fèr te Museo Ladin a Sèn Jan, en vender ai 5 de jené, da mesa les 6 da sera.

Besties che se rejona te stala, capifamilia che sciumentea, la gran cena per chi che à lurà e didà te cèsa l an dant, i Trei Rees, la scrites curiouses sora i ujes maestres; ric sacres e profans che se scontra e se mesceda, conté e animé con saer da la operatores de Museo.

 “Sarà na sera da marevea, te na atmosfera rica de segnificat per ladins, no ladins e ghesć che te chisc dis de festa i é rué te Fascia per se goder la neif e sia vacanzes coi schi, ma che segur i à gust de se arvejinèr a l’identità e a la tradizion ladina, valor enjontà de la perferida turistica amò pech uzà fora sul teritorie”, recorda la Diretora Sabrina Rasom.

Te chesta ocajion vegnarà dat fora ence na peta deldut particolèra fata coi ingredienc de la tradizion de Pèsca Tofènia, tirèda fora de crigna di recorc de la giava Carlota de Fiech da Vich.

Ve speton de n muie e recordave de ve prenotèr chiaman ite l numer 0462/760182 o manan ite n messaje Whatsup sul medemo numer.

Entrèda al event e te Museo 8,00 euro.