Dar vorsitzar vodar autonome Provìntz vo Poatzan un provintziàl asesór vor di nåsüach un vornaügarung Arno Kompatscher iz er o kontént von tèma zornìrt: “Di enerdjì iz ummana von zentràln questiongen von ünsarn zaitn, åhevante von gespàra enerdjì afte sicharum zo magara hèrta håm genumma sin zo macha söttana boda mage hèrta soin vornaügart. Zo maga schètzan azpe ’z hatt z’soina di solutziongen di nåsüach iz dar grunt. Pitt disan prais böllbar schupfan, vürvüarn un machan khennen tra de se in a nètz di djungen nåsüachar boda arbatn aft disan tèma”. Disa initziatìf iz nèt lai eppaz guatz vor di djungen ma vor da gåntz kamòuschaft un vor di ekonomì von Euregio.

“Soin guat zo maga håm enerdjì sichar un boda mage khemmen augehaltet iz ummaz von bichtegarstn sachandarn vor di zukunft von gåntz Euregio. Vor daz sèll impaitemar naüge solutziongen von djungen bizzschaftar von Tiról, Südtiról un Tentino aftz disan tèma”, asó khütta, anvétze, dar Låntshauptmånn von Tiról Anton Mattle. Pittnåndar pittar tirolesan asesören Cornelia Hagele, dar Mattle rüaft alle di djungen nåsüachar zo nemma toal vürzovüara in Euregio. “Dar prais Euregio vor djunge nåsüachar schützt nèt lai da bizzscahft pintom zbisnen di drai toaln von Euregio, ma darzuar gitt an bichtegen tèknische schütz ünsarn lentar”, hatta khött da provintziàl asesören Hagele.

In peste prodjèkt barten khemmen zuargètt dar prais un darkhennt 5.000 euro, 2.500 euro bartn khemmen gètt in zboate un 1.000 euro in draite. Di prodjèkte bartn khemmen zornìrt vonar djurì vürgevüart vodar vorsitzaren Ulrike Tappeiner, Vorsitzaren vodar Frai Universitét vo Poatzan. Dar prais bart khemmen gètt in tage von Vairta von Tiról in européan Forum vo Alpbach atz 20 von snitt von 2023. Berda bart håm gebunnt bart khemmen gerüaft zo zoaga soi arbat un zo redada drau pitt gekhennate bizzschaftar un politesche leader.

Allz bazta iz zo mocha bizzan übar in Prais Euregio vor djunge nåsüachar makmaz vennen afte web sait von Euregio  www.euregio.info/youngresearcher
Übarsetzt von Schaltarle vor di Zung von Toalkamòu vodar Zimbar Hoachebene