Vor in vorsitzar von Euregio un vodar autonome Provìntz vo Poatzan dar Prais Djunge Nåsüachar Euregio iz sa sèlbart a bichtegar zil vor  in Euregio Tiról-Südtiról-Trentino: schupfan di djungen z’arbata in an sektór, dar sèll vodar nåsüach grüntlich vor di djar boda khemmen, haltante kunt ke übar dise argoméntn ünsarne lentar arbatn drau sidar ettlana zait. Darzuar dar tèma boda di djungen nåsüachar soin gerüaft z’zoaga baz da soin guat zo tüana, da khünstliche intelligentz, macht disan prais no mearar interesånt un bichte.

Vor in vorsitzar vodar autonome Provìntz vo Tria dar Prais iz a groaza oportunitét vor di djungen nåsüachar, di arbat vo disan djunge helft starch zo venna naüge solutziongen vor di sbern prüf boda ünsarne lentar bartnen vennen vür.
Schupfan zo redase un auzzobèkslanen bazma khånt ummaz pinn åndar übar di grentzan iz sichar an modo zo konkretizara bazta iz khent vorgelekk in okasiong von G7 bodase iz gehaltet vor bintsche zait ka Tria pròpio übar in tèma vodar khünstliche intelligentz, asó hoffe azza soin vil di djungen interesàrt zo nemma toal disarn naüng editziong.

Vor in vorsitzar von Lånt Tiról da khünstliche innteligentz macht kuriositét un gevallt in laüt, ma in da gelaichege zait machtze di vort o. Da soin bintsche di sachandarn boda håm oportunitét un perikole asó nåmp azpe in da KI. Di tèknolodjì iz nia vürgånt asó bahémme azpe in disan kaso.
Pinn Prais Djunge Nåsüachar Euregio 2024 bölltma machan khennen di djungen nåsüachar boda arbatn garade afte khünstliche intelligentz. Da KI mocht no khemmen auzgebetart, klasifikàrt un analizart vodar bizzschaft, zo maga zuargem in politike zo vestega regln un ort. Ma rüaft asó alle di sèlln boda soin interesàrt innzogeba soine arbatn aftz disan tèma vodar KI. Di toalnemmar durch in Prais Djunge Nåsüachar  mang gem soin bichtege schützt in gåntz Euregio un håm oportunitét zo reda übar dise teme pitt bichtege bizzschaftar.

Dar vorsitzar vodar håndl Khåmmar vo Poatzan gedenkht ke di bichtschaft gianat nèt vür åna nåsüach, ombrómm di nåsüach iz dar grunt von naüng idee, tèknolodjìan un stratedjìan. Di nåsüach iz nèt lai vor disa zait ma di helft zo macha vürgian di gesèllschaft. Vor di håndl Khåmmar dar prais Djunge Nåsüachar Euregio iz an oportunitét auzohalta disan bichtegen protzèss boda macht krescharn un bill darzuar merchan bia allz ditza iz bichte.

Dar vorsitzar vodar håndl Khåmmar vo Tria hatt untarstricht bia di djungen nåsüachar pitt soinar kuriositét, zèchhait un kompeténtz, soin di kraft vodar vornaügarom un vodar bèkslom. Vor daz sèll, Azpe istitutziongen un untarnemmar mochtmen gem an groazan schütz un auhaltnse zoa azza mang zoan an pestn daz sèll bosa soin guat zo tüana. Vor daz sèll dar Prais Djunge Nåsüachar Euregio iz a bichtega okasiong zo macha starche pintom zbisnen dar bèlt vodar nåsüach un da sèll vodar arbat in a kornìs transnatzionàl boda schützt un gitt vèrt un macht khennen di sachandarn boda di djungen nåsüachar khånen tüan.

Vor di vorsitzaren vodar håndl Khåmmar von Tiról, boda hofft aztada soin vil toalnemmar, iz bichte vürvüarn di vornaügarom un di nåsüach in Euregio Tiró-Südtiról-Trentino ainfach ombrómm di vornaügarom machtaz starch. Di håndl Khåmmar von Tiról schützt di untarnemmar aft soin bege zo venna hèrta naüge solutziongen. Vor daz sèll izta mångl azta dar Prais Djunge Nåsüachar mage zuargem daz djust maz gèlt in sèlln boden gebinnen.

Di informatziongen aftn båndo venntmase afte websait: https://www.europaregion.info/it/euregio/progetti/scienza/premio-giovani-ricercatori-euregio/

Aftz disan link dar formulàr online zo nemma toal: https://forms.office.com/e/USyk9nGLEi)
In finalìstn barten khemmen gezalt dar viazo un di herbege vor zboa nècht atz Alpbach.

No åndre informatziongen mang khemmen gevorst in toal Åmt von Euregio Tiról-Südtiról, Trentino riferimént Jasmin Penz  (tel. +43 512 5082355; jasmin.penz@euregio.info).

Übarsetzt von Schaltarle vor di zung von Toalkamou vodar Zimbar Hoachebene