La rilevazion la é perveduda da la “Normes de metuda en doura del Statut spezièl de la region Trentin Sudtirol en cont de desposizions de stravardament de la popolazions ladina, mochena e zimbra de la provinzia de Trent” (d.lgs. 592/1993). La domana prinzipèla la fèsc referiment a la partegnuda a una de la popolazions ladina, mochena e zimbra. L chestionèr l pel vegnir scrit ite da la persones enciasèdes te provinzia de Trent che se sent de fèr pèrt de la popolazions ladina, mochena e zimbra, ma ence che no les fèsc pert de chestes e che les vel l palesèr, scrivan ite la modalità de responeta “nesciuna de la trei”.

Se pel tor pèrt scrivan ite l chestionèr, te trei vides:

• Tras web, con n program fat e gestì da Ispat. Istruzions tecniches/operatives scempies per l coleament, les ge vegnarà manèdes a duta la families de la provinzia de Trent tras posta dessema ence co la comunicazion informativa en cont de la rilevazion.
• Per chi che no à l computer o no l’é bon de l durèr, bèsta che l vae te Cèsa de Comun olache l’é enciasà, olache l’é stat enjignà na postazion con assistenza per la compilazion tras web, tel respet rigoruos de la privacy.

• Desche ùltima possibilità, se pel scriver ite l modul sun papier te Cèsa de Comun olache se é enciasé, e l dèr de retorn te na soracuerta serèda.

Tinùltima, con scomenz ai 8 de november, demò ti comuns de insediament storich de la trei popolazions (per i ladins Ciampedel, Cianacei, Mazin, Moena, Sèn Jan, e Soraga; per i mochegn di Fassa-Soraga; Vlarotz, Garait e Palai en Bersntol; per i zimbres: Lusérn), la families che no les arà amò scrit ite l chestionèr les vegnarà chiamèdes ite dai rilevatores che i ge enjignarà l chestionèr sun papier e dapò i lo binarà sù de retorn serà ite te na soracuerta.

La informazions che vegn binà sù les vegnarà tratèdes tel respet de la normativa en cont de stravardament del secret statistich e de stravardament di dac personèi. I resultac i vegnarà dac fora biné adum te sezions e donca no l’é meso de entener a colun soget che i se referesc. Per chesta rilevazion no l’é pervedù l’obligh de responer.

Per informazions e assistenza per scriver ite l chestionèr se pel:

• chiamèr ite l Numer Vert ISPAT 800 0836393, dai 4 de otober ai 20 de dezember, da lunesc a jebia da les nef da doman a les cinch da sera e de vender da les nef da doman a la una domesdì.
• scriver ite a la direzion de posta eletronica censpermpop.tn@provincia.tn.it

• vardèr fora l sit de l’ISPAT a la direzion www.ispat.provincia.tn.it, jir ite te la sezion resservèda per la rilevazion de la popolazions de lengaz ladin, mochen e zimber.

Traduzion di Servijes Linguistics e Culturèi del Comun general de Fascia
(Traduzione a cura dei Servizi Linguistici e culturali del Comun general de Fascia)