Traduzione in cimbro
Khennen di arbatn vo pèrge pitt EUSALP
Zo nemma toal in "Discover Mountain Jobs editziong 2025: beldar un gehültz" tarfmase innschraim vor atz 31 von höbiat
[Cimbro] Discover Mountain Jobs iz a summar kåmp vo EUSALP übar beldar un bia ’z khinta genützt ’z gehültz, ’z mangda nemmen toal di djungen von 18 sin afte 26 djar. Haür bartz soin dar Trentino zo herbega di toalnemmar zornìrt, vor an esperiéntz vo drai tang atz Rontschòi un Tesero von 18 sin atz 20 von herbestmånat 2025.
Dar trèff iz khent augelekk von Khnopf aktziong 3 (AG 3) vo EUSALP “Arbat, istrutziong un formatziong” – durchgevüart vodar autonome Provìntz vo Tria – un iz augehaltet pinn gèlt von prodjèkt Support EUSALP (FESR, nå in Interredjonàl Progråmm Alpinar Raum). Disa iz a hauparbat vo AG 3 “Djunge un arbat” ’z zil iz daz sèll zo macha khennen pezzar in djungen di profesiongen gepuntet in pèrng un boda mang khemmen vürgevüart afte Alpm, zoa zo macha stian di laüt zo leba in di lentar vo pèrge un darhaltn in kulturàl schatz vo disan lentar.
Di toalnemmar bartn håm okasiong zo lirna eppaz mearar gevüart vo espèrte bodasen drinndarkhennen vo beldar un vo allz bazta ågeat in gehültz un di arbatn von holtz, gianante z’sega sèlbart di firmen von ünsarn lentar boda arbatn aftz ditza un asó krescharn in soi arbat.
Di plètz soin 20 un di toalnemmar bartn khemmen zornìrt.
Ma mochtze innschraim vor atz 31 von höbiat 2025 aftz disan link: https://forms.gle/pnmAZHiZLoMGnkmU6
Di toalnemmar bartn khemmen geherbeget in Villa Flora atz Rontschòi. Èzzan un slavan iz drinn in progråmm. An toal von sèll boda khint gezert vor di viazan bart khemmen gètt bidrùmm. Dar progråmm bart khemmen vürgetrakk atz belesch un inglés.
Vor informatziongen: eusalp.labourandeducation@provincia.tn.it
Da gekhluppet: dar plakatt
Übarsetzt von Schaltarle vor di zung von Toalkamou vodar Zimbar Hoachebene
(cdt)
Immagini
