[Cimbro] Machan a sait vonan kalandardjo pittnar foto dar soinen, disa iz an oportunitét boda haür o khint gètt in pürgar von Euregio Tiról, Südtiról, Trentino: defatte, ’z izta zait sin an sunta atz viar von snitt zo vazza di foto afte websait von Euregio un vürlengse dar djuria z’soina zornìrt. Di foto boda bartn gebinnen bartn khemmen gelekk aftn kalandardjo von Euregio 2025.
Ma mage zornìrn aniaglan argomént: daz bichte azta di foto soin khent gemacht in ummaz von drai lentar von Euregio un azza zoage bazzez iz disa earde.
Dar vorsitzar von Euregio un vodar autonome Provìntz vo Poatzan Arno Kompatscher, vorst in toalnemmar zo giana übar di grentzan zo süacha baz abezonemma. “Bar hoffan azta saibe a naügez seng, boda geat übar di grentzan un azta khemmen abegenump saitn von Euregio boda nia soin khent abegenump”. Vil foto bartn zoang gåntz schümmane auzseng, laüt un eleméntn vodar kultùr, vodar arkitetùr, un von traditziongen, odar no rarege moméntn un eventn gelaich in gåntz Euregio.
Dar Kompatscher un di vorsitzar vodar autonome Provìntz vo Tria Maurizio Fugatti un von Lånt Tiról Anton Mattle, khön alle ke ’z iz eppaz guatz azta khemmen ågenump foto vo aniaglan argomént un khönse mearar no baz kontént azta di initziatìf saibe hèrta mearar gekhennt: defatte disan stroach bartnda khemmen auzgètt 16.000 kòpie, vorz djar 2024 anvétze soinsa gest 13.000 vor in groaz kalandardjo, vor in khlumma di kòpie auzgètt bartn soin 11.000, vor haür soinsa gest 8.000.