Per la Provinzia autonoma de Trent à tout pèrt Valeria Placidi, sorastanta generèla del Partiment afares e relazions istituzionèles, che l’à recordà la emportanza de la mendranzes te l’autonomia che ge vel sostegnir e stravardèr, col ge arsegurèr la ressorses che fèsc besegn per arjonjer resultac semper miores; Giuliana Cristoforetti, sorastanta del Servije mendranzes linguistiches locales e audit european, che l’à portà dant l pian de la informazion e la spartijon del Fon per la Mendranzes 2022, col meter al luster ence la sacotanta ativitèdes de studie e de promozion di lengac e de la cultures de mendranza trentina, desche la enrescida soziolinguistica en esser e l liber del Minister per i bens culturèi dintornvia la mendranzes storiches de nosc raion; Paolo Simonetti, sorastant Umst per la inovazion ti setores energia e telecomunicazions, che l à rejonà enveze del davegnir de la comunicazions e de la emportanza de sostegnir projec de cablaje e fibra otica ence con chela de sparpagnèr l’informazion ti lengac de mendranza. A la scontrèda virtuèla à tout pèrt i rapresentanc de la istituzions de la trei comunitèdes de mendranza e l conseier provinzièl ladin Luca Guglielmi, che i à dat ju sie parer a favor dintornvia i ponc al orden del dì.

Endèna la Conferenza l é stat portà dant apontin la desponibilità de la ressorses sul Fon de la mendranzes per l 2022, che la é de 738.850 euro. La zifra la é resservèda a projec che à gran fazion per la defendura de la mendranzes linguistiches, porté dant da aministrazions locales, istituzions scolastiches e istituc culturai, a scomenzadives endrezèdes da la Provinzia, al pian organich di intervents de politica linguistica e culturèla del Comun general de Fascia, estra che al pian de la informazion. Aldò de chel che perveit la normativa provinzièla, de fat, i sentadins che fèsc pèrt de la popolazions de mendranza i à derit a aer informazions tant scrites che audiovisives tel lengaz de ogne comunità. L obietif generèl, l é chel de fèr a na vida che l lengaz de mendranza l vegne rejonà te la vita de ogne dì, te familia e te la sozietà, acioche l arjonje valuta e nonzech. Se vel miorèr ence la calità e la desvarianza de la informazion, ajache lurèr fora sacotenc argomenc comporta na maor enrescida lessicala e viventea la gaissa de durèr l lengaz de mendranza. N auter pont de enteres, l é l svilup de la competenzes di operatores e de la rei de la colaborazions te dutes trei la comunitèdes e la doura de la tecnologies digitèles e di neves media acioche posse nascer n leam fon anter l lengaz de mendranza e la neva generazions.

L pian di intervenc per l’editoria e l’informazion per l an 2022 l era jà stat vardà fora e spartì anter duc tel ambit del Desch de la comunicazion de la Mendranzes linguistiches. La suma del finanziament la é de 435.624 euro. Anter la scomenzadives en program l é la piates per mochen e zimber che va fora ogne chinesc dis sul folio local, i notizières ti lengac medemi, la produzions televisives, la trasmiscions radiofoniches e l folio de vigni setemèna per ladin. L é pervedù amò apede n stanziament de 120.000 euro per i intervenc de informazion che la Jonta provinzièla dezidarà de meter a la leta per la informazion radiotelevisiva per lengaz de la mère – o per la popolazions germanofones per todesch – che i vegnarà fac fora via per l an. En pratega, se volessa fèr ruèr te nesc raions de mendranza canai per todesch e per ladin. Per chel che vèrda la convenzion RAI Com-PAT, n auter pont al orden del dì, l é stat deliberà sie renovament enscin a de firé del 2022, canche vegnarà metù a jir l switch off del canal che à inom “Rai Sender Bozen”.

Traduzion di Servijes Linguistics e Culturèi del Comun general de Fascia
(Traduzione a cura dei Servizi Linguistici e culturali del Comun general de Fascia)