Traduzione in ladino
Fon Euregio per la enrescida, aproèda la cordanza per 1,3 milions de euro
I projec finanzié i cognarà esser de enteres per duc e trei i teritories del Euregio
[Ladino] Aproà da la Jonta provinzièla, aldò de la proponeta del Assessor al svilup economich, lurier, università, enrescida, l schem de cordanza de colaborazion anter l GECT Euregio Tirol – Sudtirol – Trentin, la Provinzia autonoma de Trent, la Provinzia autonoma de Busan e l Land Tirol per la cooperazion di trei teritories en cont del 5° avis del Fon Euregio per la enrescida (ESF).
Per l assessor la promozion, la crescimonia e l sparpagnament de la enrescida e de l’inovazion i é strumenc fontamentèi per l svilup, tant del capital uman che del sistem de la firmes. De fat vegn tout ite la calità e la competitività de dut l teritorie provinzièl. Per chest la Provinzia la se met dant de a renforzèr la posizion internazionèla del Trentin tel setor de la enrescida e de l’inovazion ence tras la scomenzadives del Euregio.
L provediment l vèrda l jir inant co la ativitèdes finanzièdes tras l GECT Euregio tel ciamp de la enrescida de basa; apontin anchecondì l é stat finanzià tel chèder del ESF cater avisc, che i à dat l met de meter a jir 23 projec inter-regionèi per zirca 8,5 milions de euro en dut.
I projec ametui a finanziament per i trei egn 2025/2027 i podarà se emprevaler de 1,3 milions de euro metui a la leta da noscia Provinzia a scomenzèr dal an che vegn, descheche sotrissà dal president de la Provinzia autonoma de Trent.
L GECT Euregio l à anter si obietives ence la promozion e l renforzament de la atività coordenèda de enrescida scientifica, tras scomenzadives che tol ite enrescidores de duc e trei i teritories del Euregio, donca Tirol, Sudtirol e Trentin. Per chesta rejon presciapech aca 10 egn la Jonta del GECT l’aea deliberà de meter su l ESF (Euregio Science Fund), che vel portèr dant projec inter-regionèi de livel internazionèl tel ciamp de la enrescida de basa, te setores de enteres spartii da dut l raion. Per chest vegn pervedù la sotscrizion de na Cordanza de colaborazion anter l GECT medemo e i goergn di trei teritories en cont di avisc e di termins. Col provediment de anché, donca, vegn aproà l schem de chesta Cordanza de colaborazion e ge vegn dat l’autorisazion al President de la Provinzia de sotscriver la cordanza medema, estra che meter a la leta sul bilanz provinzièl la ressorses debesegn per finanzièr chisc projec.
L coordenament de la cabina de regia e di doeres coleé al quinto avis del ESF l ge vegn dat su te na pruma fasa al Land Tirol e demò per la fasa de valutazion de la proponetes de projet ence col sostegn del Fon austriach per la scienza (FWF), atività per chela che l provediment de anché l à metù a la leta a favor del GECT Euregio na quota pèrt a cèria de vigni teritorie de 86.666,67 euro.
Autra informazions les é a la leta sul sit: https://www.fwf.ac.at/en/funding/portfolio/international-collaborations/tyrol-south-tyrol-trentino
Traduzion di Servijes Linguistics e Culturèi del Comun general de Fascia
(cdt)
Immagini
