De zòmmòrbet en Euregio zbischn Tirol-Sudtirol-Trentin hòt groasa tritt envir gamòcht gèltsgott en de projektn as guat gòngen sai’, abia de euroregionalnochrichtn van schneala’n (https://valanghe.report/bulletin/latest) oder de Euregio-Tickets ver en lokalverkear (https://www.europaregion.info/it/euregio/progetti/mobilita-trasporti/euregio-ticket/). En rom van zboate trèff van program Interreg “Fit4Co”, iaz s ist moglech enviretrong naia projektn pet de hilf van auskennetlait.

“Fit4Co gip en de toalnemmer de moglechkait za òrbetn iber en de transfrontaliartn temen pet de zòmmòrbet va professionistn en rom van project management, van projektzuazol ont va de interkulturalòrbet. De doin projektn gem an bichtegen paitrog za versterchern de zòmmòrbet en Euregio ont za gea’ iber en de grenzn”, sok Elisa Bertò va de
òllgamoakanzlai van Euregio.

De doi naikait hòt zaruckgem mearera projektn as guat gòngen sai’, abia “Sproch Inn” iber en de bersntoler minderhait en Trentin, ver de beil as hòt Leo Toller van Bersntoler Kulturinstitut klòfft, der Master Euregio, s verpessern van u’stelltn ont der verglaich zbischn de òllgamoa’amministrazionen, vourstellt va de viareren van TSM - Trentino School of Management Paola Borz oder abia “Digiway” ver de sicherkait en pèrg, vourstellt va Arezia Ronchini van Dinst ver en turismus ont sport va de Provinz va Trea’t.

“De doin projektn as guat gòngen sai’ van earste mol van Fit4Co, mòchen verstea’ as de transfrontaliarte zòmmòrbet pet an strukturiartn plan ont de hilf va auskennetlait funzioniarn mu. Ber sechen nea’mer de stunn za kriang vourtschbinnen va projekt ver en doi mol va Fit4Co. S kemmen u’ganommen òlla de projektn as belln versterchern de zòmmòrbet zbischn lender, en zòmmlem ont ver de birtschòft en Euregio. S hòt koa’ grenzn en de kreativitet en aigene rom va kompetenz”, hòt derzuatsòk Matthias Fink, koordinator van projekt Fit for Cooperation.

“Abia tsòk, de a’nungen va projekt “Fit4Co” meing vourstellt kemmen finz af de 15 van heibeger 2024 en de adress www.fit4co.eu.

S kemmen inngalont za trong envire transfrontaliartn projektn, òlla de òllgamoa’amministrazionen, de zòmmlemtoaln ont de regional management van Euregio Tirol-Sudtirol-Trentin, va Kernten, van Veneto, van Friuli-Venezia Giulia (toalnemmer van Euregio A’ne Grenz) ont van Land Salzburg.

Dinstletratt kuriart van Druckomt va de Autonome Provinz va Trea’t.

Do der arkiv pet de pilder ont de vrogn kuriart van Euregio:
https://drive.google.com/drive/folders/1KqSPISQDrMcVO6TXJtZhdDoKZ1DJYgoz?usp=sharing

Ibersetz gamòcht van Sprochtirl va de Tolgamoa'schòft Hoa Valzegu' ont Bersntol