L program l perveit tel scomenz i intervenc del president del Consei de la Provinzia autonoma de Trent, del president del Consei de la autonomies locales, del president de la Provinzia autonoma de Trent.

Do ge vegnarà dat su l’onerifizienza de l’ègua de Sèn Vanceslao a Günther Platter, Capitan del Tirolo dal 2008. Platter, 68 egn, per vèlch an l é stat tipograf e do l à fat servije desche ofizièl de la gendarmeria, tinultima, te la metà di egn Otanta, l se à dat ju te la politica dant desche conseier e do desche ombolt de Zams, tel Tirol. L é member del Goern tiroleis dal 2000 en ca, l é stat ence Minister federèl de la defendura e del intern de la Republica de l’Austria.

L protagonist de la sera sarà do l Cor de la Sat, per chel che no serf prejentazions. L grop l é stat metù su a na vida ofizièla a Trent ai 25 de mé del 1926 col inom Coro della Sosat, do, ti egn Trenta, l é stat mudà te Coro de la Sat, canche l se à portà dant te la Sala grana del Ciastel del Buonconsiglio. L é stat ret tel scomenz da Enrico Pedrotti enscin del 1938, do da Silvio Pedrotti per più che cincanta egn e ades da Mauro Pedrotti, nez de Silvio e fi de Mario. L cor l à ciantà te più che mile conzerc te la Telia, te la Europa, (Austria, Belgio, Cecoslovacchia e ades Repubblica Ceca, Danimarca, Finlandia, Franzia, Germania, Gran Bretagna, Olanda, Russia, Svizra), te l’America (Brasile, Canada, Messico, Stati Uniti) e te l’Asia (Corea), ti teatres più de nonzech. Sacotanta la edizions de la 300 cianties del repertorie e la incijions, che tol ite cheles dal 1993 enscin a cheles più neves per endrez de la Fondazion Coro Sat (nef cd e un dopie cd con presciapech 200 cianties dal 1996 al 2015).

Traduzion di Servijes Linguistics e Culturèi del Comun general de Fascia
(Traduzione a cura dei Servizi Linguistici e culturali del Comun general de Fascia)