I projec di joegn artisć trentins che l é  stat finanzià
Ti dis passé l é stat aproà la graduatoria di projec ametui a contribut e che i é stac porté dant da artistes e artisć joegn trentins en ocajion di Cinacanta Egn del secont Statut de autonomia. Se trata de proponetes portèdes dant te avisc pervedui da l’Aministrazion provinzièla per sostegnir la proponetes per i doi egn 2021-2022; la scomenzadives les à l fin de valorisèr e sparpagnèr, soraldut te la generazions neves, la storia trentina e l davegnir de l’autonomia, en referiment ai 50 egn (1972/2022) del ordenament spezièl del Trentin Sudtirol. L é stat aproà sun doi egn 8 projec, per na suma de 95.884,60, de chisc, 6 i é apontin projec pervedui per l 2022 per na suma de € 70.384,60.

La perferida formativa
Apede ai percorsc porté dant dal Consei Provinzièl per l an de scola 2022/2023, la Fondazion Museo storich del Trentin dèsc l met de veder la gran instalazion “Spettacolo: un viaggio in 200 anni di storia” endrezèda aló da Le Gallerie di Piedicastello, co la possibilità de cognoscer i percorsc didatics “La carta d’identità del Trentino”, “L’invenzione di un territorio. Il Trentino nell’Impero asburgico”, “L'energia dell'acqua. Storia dell'industria idroelettrica in Trentino”, “Capire l'autonomia” e “Novecento Trentino. Dalla Grande Guerra all'Autonomia”, se podarà ence veder l Spazie Degasperi a Palaz Thun, estra che fèr la vijites compagnèdes a la mostra permanenta “La Provincia si racconta”. Autra informazions se pel les lejer te la enjonta “La perferida de formazion de la Fondazion Museo storich del Trentin en ocajion di Cincanta egn del Secont Statut d’Autonomia”.

Forum de l’autonomia
Dal meis de setember inant, tel palaz de la Provinzia vegnarà endrezà na lingia de evenc, prejentazions, seminaries dediché a la storia e a la cultura de l’autonomia. Avisa, vegnarà portà dant e analisà i libres “50 anni di autonomia” endrezèda da Mauro Marcantoni, e portà dant aprofondimenc dintornvia la piates più emportantes de noscia storia. En vender ai 16 de setember del 2022 sarà la pruma scontrèda dedichèda a la chietanza liberatoria (1992).

L sit
L program e la scomenzadives dai 5 de setember, dì canche l Trentin zelebrea sia autonomia spezièla, i é stac metui te n sit aposta, olache vegnarà metù ite ence duc i comunicac stampa che i fèsc referiment a la scomenzadives per i cincanta egn del secont statut. Tel sit vegnarà metù ite n studie su la storia de l’autonomia e, più en generèl, del Trentin, apontin percheche l’autonomia l’à sia reijes te chest percors particolèr de chest raion de confin. La piata la vegnarà agiornèda a do a do e smaorèda e se arà l met de desćiarièr contribuc spezifics; anter chisc i libres che i é do a vegnir endrezé "Le politiche provinciali e gli aspetti istituzionali dell'Autonomia", dediché a la storia di ultimes cincanta egn de autogoern provinzièl, sot l endrez editorièl de Mauro Marcantoni.

Info https://www.ufficiostampa.provincia.tn.it/Giornata-autonomia

Chiò enjontà la perferida de formazion de la Fondazion Museo storich del Trentin en ocajion di Cincanta egn del Secont Statut d’Autonomia.   

Traduzion di Servijes Linguistics e Culturèi del Comun general de Fascia
(Traduzione a cura dei Servizi Linguistici e culturali del Comun general de Fascia)