[Mòcheno] Meing drau leing asn a sait van klender an aigene letrat ist a moglechkait as haier aa barts kemmen gem en de lait van Euregio Tirol-Südtirol-Trentin: s hòt zait finz as de 4 van agest 2024 ver za leing drau de pilder as de sait van Euregio ont stelln sa vour en a praisgericht ver za mòchen sa tschernen. De gabingerletratn barn kemmen gadruckt asn klender van Euregio 2025.
An iatn letrat mu’ kemmen vourstellt s hòt nèt an tema tscherlt: s bichteste ist as der letrat miast kemmen gamòcht en oa’n van drai lander as toalmòchen van Euregio ont as schellt derstelln en an kreativ vurm de schòrt.
Der president van Euregio ont va de autonome Provinz va Poazn, Arno Kompatscher, lònnt inn de toalnemmer za gea’ aus van grenz ver za suachen bos za letratarn: “Ber hoffen en a naia aussicht, as geat aus van grenzn van inser hirn as guat ist za vinnen ausòndra sòchen van Euregio”. Vil letratn barn de natur ont ausòndra lòntschòftn pòcken, lait oder kulturelementn, oder ausòndra momentn ont òlltogeta naikaitn van Euregio. Kompatscher ont de presidentn va de Autonome Provinz va Trea’t Maurizio Fugatti ont van Land Tirol Anton Mattle, sai’ oa’ne za tschbinnen as a rèchts ding ist za zoachen an iatn moment en klender ont de sai’ vroa za sechen as der druck òlbe mear kennt ist: en verglaich pet en jor 2024, der Euregio hòt 6.000 kopian va mear gadruckt, va 13.000 en 16.000 ver en klender za hengen au, ont va 8.000 en 11.000 ver en sèll za leing avn tisch.