Dar vorsitzar aftn groaz vairta vodar zimbar Hoachebene, pitt mearar baz tausankh toalnemmar
Brava Part, Fugatti: “Dar pèrge iz kultùr, gedenkh un identitét”
Traduzione in cimbro
[Cimbro] A groazar vairta vor alle, nå dar traditziong, dar identitét un boda hatt genump toal da gåntz kamòuschaft. Ditza iz gest di Brava part, boda an sunta atz 27 von herbestmånat hatt gemacht lem Folgrait pittar groazan parade vo Ekken sin in lånt. Mearar baz tausankh laüt, pitt traditzionàl kostümm, uralte arbatn, karéttn, kòre, schützen un folk khnöpf håm augelekk a manifestatziong boda hatt inngevånk alle di kamöüschaftn vodar Hoachebene.
‘Z håmda o genump toal dar vorsitzar vodar autonome Provìntz vo Tria Maurizio Fugatti, pittnåndar pinn pürgermaistar vo Folgrait Michael Rech un di pürgermaistarn von åndarn lentar, darzuar soinda o gest dar vorsitzar von Toalkamòu von Lagarina Tal Alberto Scerbo, di deputètten Alessia Ambrosi, dar vorsitzar von Åmt vor in turismo Alpe Cimbra Alessandro Casti un ettlane kulturàl feroine von lentar.
“I hån gearn z’soina da atz Folgrait zo vaira an tage boda zoaget di kraft un di gehöarhait von ünsarn laüt von pèrng. Di Brava Part iz nèt lai a parade, ma an momént boda di kamöüschaftn darkhennense in soinar stòrdja un in soinar identitét – disar dar pensìaro von vorsitzar Fugatti -. Dar pèrge iz a schatz gemacht vo kultùr, gedenkh un vèrt boda khemmen abegètt vo djeneratziong in djeneratziong, un seng pittnåndar khindar, djunge, groaze un alte iz ummaz von pestn sachandarn vo disan schümman tage. Ma mocht asó khön vorgèllzgott in fraiböllege, in Vorz Lånt, in feroine, in bånde, in kòre un alln in mearar baz tausankh laüt boda machan lem disa traditziong. Di Brava Part zoaget ditza o, biavl ’z iz bichte haltn lente di traditziongen innvångante di naüng djeneratziongen un aulegante okasiongen boda di kamöüschaftn mangse vennen un stian pittnåndar.”.
Dar pürgermaistar vo Folgrait Michael Rech hatt gemecht in groaz vèrt vodar manifestatziong azpe a momént zo vennase pittnåndar zo darhalta di traditziongen von lentar, dar hatt khött vorgèllzgott alln in ettlane feroine, in fraiböllege boda håm gearbatet herzorichta disan schümma tage. Dise börtar soin khent ågenump von åndarn autoritèt o. Dar vorsitzar von Åmt vor in turismo Alpe Cimbra Alessandro Casti hatt geredet von ruòl boda hatt di Brava Part zo kontàra di identitét vodar Hoachenene un macha khennen ünsarne lentar durch dar kultùr un di traditziongen.
Da groaz parade iz gest dar hauppunkt von tage, di laüt soin partìrt vo Ekken un soin gånt zuar in zentrum vo Folgrait. Protagonìstn soinz gest di folk khöpf un di feroine vodar Hoachebene pinn bånde un pitt åndre khöpf zuarkhent vo ettlane lentar von Trentino. Di parade hatt gevüart auz pa beng von lånt figùrn un arbatn vodar traditziong von pèrng, vodar hèkse Brava Part afte manèkkar, von schavar afte baké, sin atz ettlane karéttn boda håm gezoaget ’z lem vo dise djar.
Auz pa tage dar vairta iz gånt vürsnen pitt geèzza, musìk un åndarz in Palafolgaria un auz pa beng, darzuar soinda o gest aktivitét vor di famildje, labör un kulturàl esperientzan.
Di Brava Part hatt asó gelekk panåndar di djeneratziongen ume in an schatz gemacht vo traditziongen, gedenkh un toalnemmung, zoagantese no a bòtta an moment boma steat panåndar vor alle di kamöüschaftn vodar Hoachebene an okasiong zo machase khennen durch soi stòrdja un soi kuktùr.
Abennemmung aftz disan link https://drive.google.com/drive/u/1/folders/1iKOtS80JvXAgIyWF-RXiFDDIne4XNpEw
Übarsetzt von Schaltarle vor di zung von Toalkamou vodar Zimbar Hoachebene
(cdt)
Immagini
