Dar boletì khint auzgètt sa sidar vünf djar hatta khött dar Gaddo, an earstn iz gest a dianst lai vor da zivil Schütz, dena pittar zait hattar interesàrt hèrta mearar di laüt boda gian pa pèrng.
Haüt zo tage dar boletì von lavìn von Euregio iz vor alle di sèlln boda håm zo tüana pinn pèrge, åhevante von sèlln boda lai gian a spasso sin afte zivil schütz un afte lånt emtar. Azpeda hatt no khött dar Gaddo: “Skialpinistn, laüt boda gian pinn snearoaf un alle di sèlln boda machan spòrt afte pèrng håm zo gebinnada, ombrómm da mang seng in an blik aftz alle di redjongen von Euregio bia ’z izta di situatziong von lavìn un asó mangsa gian boda iz mindar riskio zo  macha soine eskursiongen”. Di nütze vo disan dianst soin mearare izta gånt vür zo khöda dar Gaddo. “Baispil an uantzege plattform boda alle mang nützan di gelaichegen struméntn. Daz earst vo allz da garadege übarsetzung: nützante di gelaichegen satz in di drai zungen belesch, taütsch un inglés,  alle mang vorstian allz åna azmase mage konfundarn. Darzuar dar prodjèkt gitt zuar üsåndarn spetzialistn zo leganaz panåndar, arbantate pittnåndar lirnarbar un krescharn alle.

Dar Mitterer hatt gezoaget in an video bazta tüan di profesionìstn boda arbatn in team un hatt gedenkht bia disar prodjèkt iz eppaz naügez in Euròpa, asó hatta gevorst informatziongen a redjong von Pirinei o, boda hatt di gelaichegen mångln von Euregio saiz azpe lentar, saiz azpe zungen zo nütza.
Dena hattar gelatt seng bia ’z makta khemmen genützt di websait valanghe.report boda innhaltet ploaz informatziongen un iz geschribet hoatar azza alle mang vorstian.

An lestn di Chiara Ida Pompeo von Euregio, boda hatt durchgevüart in trèff hatt gedenkht da permanént iteraktìf auzlegom übar di lavìn boda iz in setz von Infopoint Euregio Tiról-Südtiról-Trentino vo Innsbruck, boda zoaget di stòrdja von bichtegarstn lavìn boda soin abekhent in di drai lentar dòpo in earst bèltkriage un boma mak seng von menta aftn fintzta vo di 9.00 sin di 12.00 un vo di 14.00 sin di 17.00 – an vraita vo di 9.00 sin di 12.00.

Mearare informatziongen aftn boletì von lavìn von Euregio makmase vennen afte websait https://valanghe.report .

 
Foto Prèss Åmt vodar Provìntz un Euregio

Video Euregio Lawinenreport/Video Boletì von lavìn von Euregio

Übarsetzt von Schaltarle vor di zung von Toalkamou vodar Zimbar Hoachebene