Dar pürgermaistar vo Folgrait, vüarante soin gruaz alln in pompìarn zuarkhent, hatt gekheart zo khöda ke disa manifestatziong machten starch stoltz. Dar hatt darzuar khött vorgèllzgott in komitàtt boda hatt hergerichtet di maistarschaft un in pompìarn vo Folgrait, dar hatt gedenkht ke di pompìarn soinda hèrta balda iz mångl, aniaglana ur von tage un vodar nacht un aniaglan tage, bèrta un vairta.
Dar vorsitzar vodar Federatziong von fraiböllege pompìarn von Trentino, Luigi Maturi hatt kkött ke dar hatt gearn zo haba gemak herrichtn dise maistarschaft in Trentino un hatt khött vorgèllzgott in pompìarn von distrikt Vallagarina. Dar Maturi hatt darzuar gedenkht in guat sportìf gaist boda auhaltet dise gare un dar lust zo leba dise tang aftn snea azpe tschelln un in armonia.

Bia bichte ’z izta disar momént vo spòrt zo machanen naüge tschelln un zo reda pittnåndar übar ploaz sachandarn, hattz khött dar vorsitzar von provintziàl Rat, un hatt gemecht darzuar in glük zo maga gòdarn vo allz daz schümma vodar Zimbar Hoachebene.
’Z håmda gevüart soin gruaz in toalnemmar, dar Schaffar von natzional Khnopf von pompìarn  Eros Mannino un dar vorsitzar vodar APT vodar Zimbar Hoachebene  Alessandro Casti o, un dena di sponsor.

Di manifestatziong izzese offegetånt in tages von fintzta pittnan tèkneschen tagung, an vraita, anvétze, håmda ågeheft di earstn gare: da sèll vo Slalom afte piste vo Fondo Grande un abas pittar premiatziong un di gara vo ski alpinismus padar nacht afte piste vo Serrada. An såntzta atz 31 von hoachnach geatma alle au a Passo Coe bodase bartn haltn di gare vo snowboard un nordìk ski un di lestn premiatziongen. Dena barta khemmen abegenump di Fåne un gespèrtt di maistarschaft, un abegètt da 41tzege editziong. 

Übarsetzt von Schaltarle vor di zung von Toalkamou vodar Zimbar Hoachebene