[Cimbro] Di alpinar redjongen, siånka azza gehöarn in mearare State, vennense vil vert zo haba gelaichege problème. Vor daz sèll vor bintsche zait in okasiong von trèff "Presidio Arge Alp" – dar organìsm boda innhaltet di istitutzionàln vortretar von drai lentar boda håm di vorsitzarung vodar arbat Kamòuschaft, bodase håm gehatt ’z djar pellar un bodase bartn håm ’z djar darnå, Vorarlberg, Trentino un Bavìara – izta khent geredet von sèll boma sait drå zo tüana un von prodjèkte boma sait drå vürzovüara.
Di alpinar redjongen mochan gian vürsnen z’soina dar platz boda khemmen gemacht hèrta naüge sachandarn vor di firmen un vor in turismo, ma da mochan, in da gelaichege zait, khemmen geschützt zo halta hèrta a hoacha qualitét von lem vor soine pürgar. Dar alpinar raum in di djar boda khemmen o bart håm mångl vonar guatn stratedjì boda zuargitt zo maga ånemmen pezzar di problème boda vürkhemmen, asó hatta khött dar vorsitzar von Vorarlberg un vorsitzar vo Arge Alp Markus Wallner, un no, izzar vürgånt zo khöda, ünsarne lentar mang krescharn lai azta in djungen khinten zuargètt a zuarkhemmane bodase sik azpe protagonìstn. Daz earst vo allz izta mångl zo sterchra in sektor istrutziong un dena mochtma arbatn hèrta mearar un hèrta sterchar pittnåndar in alle di sektör, ditza gebat zuar in laüt boda lem in alpinar raum z’soina mearar boroatet vor daz sèll boden paitet. In trèff håmda genump toal vo baitom dar vitzevorsitzar vodar autonome Provìntz vo Tria Achille Spinelli un vor di Bavìara dar Staat Minister. Eric Beißwenger.