En jebia ai 30 de jugn l é stat aproà dal Consei provinzièl l dessegn de lege 145 de reforma en cont de la Comunitèdes de Val, portà dant dal assessor ai enc locai, ai trasporc e a la mobilità Mattia Gottardi.
“Son content per l’aproazion del ddl do n lonch confront dessema coi Teritories e col Consei de la Autonomies. – l à declarà l assessor Gottardi – L é stat na discuscion positiva e costrutiva ence te Consei provinzèl, per chela che rengrazie i gropes de maoranza e oposizion. L é stat recognosciù che se se à dat ju per l dialogh e la fazion de la Reforma, che per la pruma outa la vegn spartida dessema coi Comuns e no comanèda dal aut descheche l é sozedù n’outa”.
“L percors per ge dèr maor competenzes ai Comuns e per spartir miec l poder anter Provinzia e raions l é n vèrech dassen emportant. – à dit amò apede l assessor Gottardi – I Comuns da ades inant i podarà troèr te la Comunitèdes de val n strument per endezèr na vijion strategica e sporjer ai sentadins servijes slarié fora tel teritorie, no un ent che se met de contra o pissà per tor l post di comuns enstesc. N lech per lurèr adum, rejonèr, pianifichèr dessema coi Comuns e coi Ombolc, che i vegnarà touc ite per vigni dezijion ”.
“Se trata – à serà su l descors l assessor ai enc locai – de n resultat per duc chi che à tout pèrt per fèr su, lurèr fora e miorèr l test de la Reforma. Dut chest per l’Autonomia di raions e de sia particolaritèdes.”