[Cimbro] Vonar idea auzkhent von untarschualn vo Folgrait, Lavròu un Lusérn, ågenump un gezalt von Dianst vor di zungmindarhaitn un auzantn sachandarn nå in sèll boda auzmacht dar artìkl 24 von provintziàl gesetz n. 6 von 2008, boda vürlekk an font zo schütza un auzohalta di zungmindarhaitn. Schiar 18 khindar boda haür bartn machan verte di mittlschual, håm detzidar zo macha khemmen di stòrdja vo soinar kamòuschaft a tisch spil boda asó mage, in da gelaichge zait, divertìrn un machan khennen ’z lånt un soine burtzan. “An viazo atz Lusérn” iz an adventùr durch di staing von zimbar lånt, in aniaglaz quadröttle untartustze a stördjele, a bort azpe biar odar a spèrr zo mocha gian übar.
’Z zpil hatt di gelaichen regln von spil vodar òkk, in ditza bartma trèffan in Basilisko boda süacht auzohaltanaz un in Sambinelo dar bichtl boda stolt di kartn in sèlln boda nèt trang rispèkt dar natùr.
Dar gevèrbate kartelù un dar prodjèkt, gepuntet in an viazo gemacht au in Fassa Tal vo vor a pizzle zait, boda asó djukht a prukk zbisnen dar ladinar un dar zimbar zungmindarhait, iz khent gezoaget in åndar tage in hoachan atz Lusérn in di Bacher Saal, ’z soinda gest natürlich alle di schüalar, di schualdiridjénten Roberta Bisoffi, di maistre un di profesör von schualn. ’Z soinda o gest, dar Komisardjo von Kamòu vo Lusérn Nerio Giovannazzi, dar vorsitzar von Toalkamòu vodar Zimbar Hoachebene Isacco Corradi, di vorsitzaren von Kulturinstitut Lusérn Monica Pedrazza un dar dirèktor Willy Nicolussi Paolaz. Alle soinse khött kontént von prodjèkt boda zoaget bia di djungen un di schual håm ka hèrtz di zung un böllnse schützan un gemar mearar vèrt un bia da bölln gem vèrt in stòrege un identitèt schatz vodar kamòuschaft.