“Seng in Euregio pitt åndre oang”
“Di Akadèmia von Euregio opfart in djungen von Euregio Tiról – Südtiról – Trentino an okasiong zo vorstiana in Euregio, zo khenna vo nåmpum bazzez iz, zo giana z’sega sèlbart un daz earst vo allz zo lebanen durch alle dise trèff”. Dòpo zo haba genump toal di djungen bartn seng in Euregio pitt åndre oang. Asó vorse alln in sèlln boda soin interesàrt innzoschraibase un nèt zo vorliara disa okasiong zo lirna eppaz naügez” ditza hatta khött dar hauplåntsmånn von Tiról Anton Mattle.
Vo Toblach sin atz Arco durch Alpbach
Zo boroata di ent bochan von tagung, bartnse haltn zboa webinar boda bart khemmen khött baz ma bart tüan un boda bart mang draurenda. Da erst tappa vodar Akadèmia von Euregio bart soin von 30 von prachant atz 2 von höbiat 2023 in kulturàl Zentrum von Euregio in Toblach, in Südtiról un bart håm azpe djeneràl tèma “Kriage un patze in Euròpa”. Da zboate bartze haltn drinn in di tang von européan Forum vo Alpbach von 17 sin atz 20 von snitt 2023 in sèll boda khint khött ’z tirólar “lånt von denkhar”. Sèmm dar tèma bart soin nemmen toal un machan alle pittnåndar in Euregio. Von 17 atz 19 von bintmånat, dar khnopf bartze vennen atz Arco in Trentino, boma bart ren übar di stòrdja un di rècht boda auhaltn in Euregio.
Innzoschraibase in gåntz ziklo von tagung, pitt èzzan un slavan un viaze, khostetz 90 euro. Zo maga nemmen toal bartma mochan khånen taütsch un belsch (livèll B1 odar höachar) un an khurtzan briaf boma khött ombrómm ma bill nemmen toal.
Di Akadèmia von Euregio iz an initziatìf von GECT Euregio Tiról – Südtiról – Trentino, pittnåndar pittar “Stiftung Alcide Degasperi” un dar institùt "Eurac Research".
Übarsetzt von Schaltarle vor di zung von Toalkamou vodar Zimbar Hoachebene
