L contest “Trentino no filter - la cultura per te” se ouc ai joegn che vel jir ite tel cher de la perferida culturèla trentina e la raprejentèr con contegnui social fora de anter e enteressanc.

“Chest concors – l à dit l assessor provinzièl a l’istruzion, università e cultura, Mirko Bisesti – l é na ocajion per la generazions joenes de durèr sia creatività tras post, stories o video reel per contèr a na vida particolèra la cultura tel Trentin. Dantdaldut l é n envit a descorir la perferida culturèla, dapodò na domana de condivijion acioche ence chi che no la cognosc delvers posse aprijièr sia formes de esprescion”. “Trentino no filter defat – l à dit amò Bisesti – vel valorisèr la cultura da anchecondì col engaissèr belimpont i joegn a esser curiousc, a enrescir e a zelebrèr a na vida publica dut chel che tel Trentin a sie veder pel esser conscidrà cultura”.

La vides per tor pèrt é states portèdes dant tel detai da Alessandra Schiavuzzi, sorastanta del Servije atività e produzion culturèla de la Provinzia, e da Luca Ferrario, diretor de Trentino Film Commission. "Con chest bando – l’à despiegà Schiavuzzi – se vel fèr vegnir fora l pont de veduda di tousc desche consumadores ma ence creatores e promotores de cultura tras operes con cheles che i contarà i apuntamenc culturèi e la scomenzadives de chest istà”. "Sarà enteressant – l à sotrissà enveze Ferrario - veder coche i tousc durarà lengac che i cognosc delvers per contèr sia idea de cultura".

No l é limitazions en cont di strumenc da durèr per la creazion di contegnui digitèi, ma chisc i cogn respetèr ghenao la opzions stabelides tel Regolament, desche “Feed Post de Instagram con n carosel de amancol 3 fotos olache cogn esser la geolocalisazion e i tag di sogec prinzipèi touc ite” o ence“video TikTok inspirational (max 20 sec tel format 9:16) con musega trending de la piataforma e tag di sogec prinzipèi touc ite tel video”.

Vigni contegnù creà cognarà aer enjontà n test per na publicazion ideèla e na curta descrizion de la rejon per chela che l é stat pissà.

Chi che tol pèrt vegnarà spartii te doi categories: 18-20 egn e 21-24 egn. Per vigniuna de chesta categories la Comiscion dezidarà i venjidores. I prumes te la classifica de la doi categories venjarà 2.500 euro per om, chi che rua secondi i ciaparà 1.500 euro e tinultima chi che rua terc 500 euro. Vegnarà fat a saer i inomes di venjidores e vegnarà fat la premiazion ai 14 de setember del 2023.

La domanes per tor pèrt cogn vegnir manèdes ite dant da les 5 domesdì de en vender ai 25 de aost del 2023, demò col scriver ite l formulèr online aldò publicà sul sit de Trentino Film Commission www.trentinofilmcommission.it.

Retrac e intervistes a cura del Ofize stampa
De autra informazions su: www.trentinofilmcommission.it

L assessor Mirko Bisesti

La sorastanta Alessandra Schiavuzzi

La prejentazion

Link per desćiarièr
https://wetransfer.com/downloads/09016bdddbc238541d522488a126ce5020230622131635/ab8949f349d0b1018c4b88817367ea3b20230622131651/e34f82

Traduzion di Servijes Linguistics e Culturèi del Comun General de Fascia