Dar kontest “Trentino no filter – di kultùr vor di” iz khent augelekk vor di djungen boda håm lust zo djukhase in da trentinar kulturàl opfar machante social innhalt uantze un guat innzovånga alle.

“Disar konkors – khütta dar asesor vor di istrutziong, universitét un kultùr, Mirko Bisesti, - gitt an oportunitét in djungen djeneratziongen zo nütza soi kreativitét durch post, stories odar video reel azpe a modo zo kontara di kultùr in Trentino. Daz earst vo allz iz vorsan in djungen azza khennen da kulturàl opfar un dena azzase machan khennen in åndarn o zoa azta berda nonét khennt ünsar realtét magse khemmen zo khenna in alle soine formen”. “Trentino no filter – geata vür zo khöda Bisesti – bill gem mearar vèrt dar kultùr vo haüt schupfante di djungen nåzosüacha un zo macha bizzan daz mearaste boma mage allz daz sèll boda mage khemmen gehoazt kultùr in Trentino”.

Bia zo nemma toal iz khent khött punkt vor punkt vodar Alessandra Schiavuzzi, diridjénten von dianst vor di kulturàl arbatn vodar Provìntz un von Luca Ferrario direktor vodar Trentino Film
Commission. “Pitt disan båndo – hatta khött di Schiavuzzi – bölltma machan auvarkhemmen bazta seng di djungen saiz azpe laüt boda nützan di kultùr saiz apze söttane bodase machan, durch arbatn boda kontàrn di kulturàln opfarn un di initzitìvan vo disan summar”. “’Z bart soin interesånt – hatta kött anvétze dar Ferrario – seng bia di djungen soin guat z’arbata pitt struméntn bosa khennen garècht zo kontara di idea bosa håm se vodar kultùr”.

Ma sait nèt gepuntet atz bele struméntn zo nütza ma di innhalt anvétze mochan haltn kunt von sèll boda auzmacht hoatar dar regolamént, azpe “Feed Post vo Instagram pittnan karusèll daz mindarste pitt drai fotografian geolokalizart un tag von bichtegarstn realtèt boda soin khent inngenump” odar “video TikTok inspirational (max 20 sec in format 9:16) pitt trending musik vodar plattform un tag in bichtegarstn realtét boda khemmen gezoaget in video”.

Aniaglana arbat darzuar, bart mochan håm soin copy zo maga soin auzgètt azpe ’z hatt z’soina un vonan khurtzan schraib boda khütt ombrómm di iz khent gemacht.

Di toalnemmar bartn soin inngetoalt in zboa kategorìan: von 18 afte 20 djar un von 21 afte 24 djar. Vor aniaglana kategorì di komisiong bart machan soin roatordnung. Di earstn in di zboa kategorian bartn gebinnenn 2.500 euro aniaglaz, di zboate bartn vången 1.500 euro un an lestn di draite 500 euro. Berda hatt gebunnt khemmen khött atz 14 von herbestmånat 2023 in gelaichege tage bartnda khemmen gèt di prais.

Di vorsch zo nemma toal mang khemmen inngètt sin di 17.00 von vraita atz 25 snitt 2023, lai auzvüllante in formulàr online boma vennt afte websait vodar Trentino Film Commission www.trentinofilmcommission.it.
 
Pildar un interviste von Prèss Åmt

Zo bizzasan merar: www.trentinofilmcommission.it

Dar asesor Mirko Bisesti

Di diridjénten Alessandra Schiavuzzi

Gezoaget

Link vor in  download
https://wetransfer.com/downloads/09016bdddbc238541d522488a126ce5020230622131635/ab8949f349d0b1018c4b88817367ea3b20230622131651/e34f82

Übarsetzt von Schaltarle vor di zung von Toalkamou vodar Zimbar Hoachebene