Der kontest “Trentin no filter - de kultur ver di” klòfft en de jungen as billn drinn gea’ en de trentiner kultur ont as billn sa derbischn pet oa’zege social as pòcken.

“Der doi konkurs - sok er der provinzal asesosr ver de schual, de universitet ont de kultur, Mirko Bisesti - ist a moglechket ver de jungen ver za prauchen de krativitet pet post, stories oder video reel  abia an ausònder vurm ver za kontarn de kultur en Trentin. S ist, mear as nèt, an innlon ver za kennen de kultur ont dòra ist an vurm ver  za lòng  sa kennen gor en bem as kennt nèt òlls”. “Trentin no filter - geat er envir der Bisesti - billt giltn de haitzegento kultur za bundern de jungen, za mòchen sa pasuachen ont za mòchenen kennen òlls sèll as sei denken as ist de kultur van Trentin”.

De virm ver za mòchen toal sai’ kemmen vourstellt va de Alessandra Schiavuzzi, viarer van Dinst attivitet ont produzion va de kultur va de Provinz, ont Luca Ferrario, viarer va Trentino Film Commission. “ petn bando - hòt kein der Schiavuzzi - billt men mòchen auserkemmen sèll as tschbinnen de jungen as prauchen ober as mòchen ont mòchen kennen de kultur ont de projektn van doi summer”. “S bart schea’ sai’ - hòt unterstitzt der Ferrario - za sechen abia as de jungen pet de sprochen as de kennen barn klòffen va bos as de tschbinnen va de kultur”.

Men sok nèt de beiln plinder as men muast prauchen ober bos as men muast drucken ist drinn en verregl, abia “Feed Post va Instagram pet karosello va almen 3 letratn pet de geolocalizzazion ont tag van bichtestn borekaitn as kemmen innganommen” oder “video Tik Tok nspirational (max 20 sec in formato 9:16) pet liad trending va de piattaforma ont tag van bichtestn borekaitn drinn en video”.

Òll naia idea bart miasn hom zòmm a copy ver za leing aus en rècht vurm ont muast sai’ patschrim der avai as de ist kemmen tschbunnen.

De toalnemmer barn sai’ toalt en zboa gruppn:  18-20 jor ont 21-24 jor. Ver an iatn de kommission bart song ber as hòt gabungen. De earstn van zboa gruppn barn gabinnen 2.500 euro ver oa’, de zbaitegen barn kriang 1.500 euro ont de drittegen 500 euro. Men bart song ber as hòt gabungen ont gem de prais as de 14 van leistagst 2023.

De vrong ver za toalnemmen meing kemmen tschickt finz um 17.00 van vraita as de 25 van agst 2023, petn formular online as ist ausgaleik as de sitz van Trentino Film Commission www.trentinofilmcommission.it.

Pilder ont vrong gamòcht van Druckomt
Mearer nochrichtn as: www.trentinofilmcommission.it

Der asesor Mirko Bisesti

De viarer Alessandra Schiavuzzi

De vourstell

Link ver en download
https://wetransfer.com/downloads/09016bdddbc238541d522488a126ce5020230622131635/ab8949f349d0b1018c4b88817367ea3b20230622131651/e34f82

Ibersetz gamòcht van Sprochtirl va de Tolgamoa'schòft Hoa Valzegu' ont Bersntol