Ma no sarà demò n percors resservà a la rodes, l é pervedù apontin de passèr via l ruf con chela de smendrèr la ertes e enjignèr, tras na curta galaria, longia 21 metres, n sbociament per la Veisc che tel cajo de èga autes la podessa blochèr l strentoi che l é sot l veie pont “Pont de Mur” che l é te la man mingol più n ju del zenter de paisc. Con chest percors vegnarà miorà ence l percors da d’invern per la Marcialonga, per chela che no ge volarà più endrezèr strutures provisories ma se podarà se emprevaler del percors enjignà per jir a pe e co la roda. Co na soula opera se vel arjonjer cater obietives: endrezèr na strèda che la dae l met ai sacotenc ghesć de Fiem e Fascia de passèr fora l paisc de Moena a na vida più segura che chela de anchecondì; coleèr la pèrt sud de Moena con chela nord; slarièr la sezion idraulica da vejin al “Pont de Mur” tel cajo de èga auta; miorèr l endrez del percors da d’invern per la Marcialonga.

Chesta opera la miorarà la rei de la strèdes per jir a pe e co la roda de la Provinzia de Trent che anchecondì la tol ite 12 percorsc per presciapech 450 chilometres e che del 2021 l à contà 2.500.000 passajes, con n smaorament del 13% respet al 2020. L é stat calcolà che del 2021 l é stat fat 52.000.000 chilometres co la roda e a pe su la rei di percorsc aposta che l é tel Trentin, col comportèr n sparagn de 3.700.000 litres de carburant e 8.500.000 kg de CO2 e n sparagn economich de più che 40 milions de euro sui auti. Vegn calcolà ence presciapech 100 milions de euro al an de gra al turism de chi che va co la roda.

Traduzion di Servijes Linguistics e Culturèi del Comun general de Fascia
(Traduzione a cura dei Servizi Linguistici e culturali del Comun general de Fascia)