Di televisiongen un di informatziong portél boda arbatn in Trentino mang inngem in vorsch zo haba in schütz vürgelekk von provintziàl gesetz von djar 2016 auzohalta da låntliche informatziong, von 2 sin atz 31 von bimmat. An vraita atz 15 von herbestmånat da provintziàl Djunta hatt defatte ågenump di delibera boda innhaltet in naüge regolamént boda auzmacht di kritèrie un bia zuarzogeba di schütz - nèt mearar baz 200.000,00 euro in drai djar azpeda auzmacht da Européan Uniong - auzohalta da låntliche informataziong.
Di bèkslom boda soin khent inngevüart afte kriterie bölln machan az saibe destrar kontrolàrn berda hatt rècht zo haba zuargètt dise schütz un di zbing boda soin vürgelekk. Darzuar dar schütz bart nemear khemmen gètt abeziagante di augeln boda berden vånk schöllat zaln, ma in konto kapitàl garade aftn loaf konto vodar firma bodaren iz khent zuargètt.