Traduzione in mòcheno
Schual ver en lòntregiar ont ver de lòntschòft van TSP, untersuach en Bersntol
En pfinsta as de 26 ist u’pfònk der workshop as de tipische lòntumpau pet trèffn ont untersuach asn lònt
[Mòcheno] En vouder vraita hòt se gahòltn der earste trèff as de untersuach vourtrong van TSM Step | Schual ver en lòntregiar ont ver de lòntschòft ver en projekt “De kròft va de sprochminderhait: s bider augea’ van tatischn derver en sud van Alpn” en Bersntol. De untersuach mòcht toal van workshop pet titl “Derhòltn de tipische lòntumpau ont bèrt gem en de alpine lònschòftn, heff ont pèrg lòntschòftn: bider mòchen, auspaun, biderprauch”, gamòcht zòmm pet de innricht van òrbetu’lear ont bèrkn, Lòntschauag ont der Stòttplòtz van trentinische lòntschòft, CITRAC, Enaip Trentin Hoa òrbetu’lear, der Stòttplòtz van Stelvio ont der Bersntoler Kulturinsitut.
Der workshop, bou as toalganommen hom viarsk architektn, ackerpau, forestaln ont studentn va de Hoa u’learòrbet ENAIP, ist u’pfònk en pfinsta as de 26 van leistagest ka Trea’t bou as toalganommen hom der Giovanni Gardelli, iberòll viarer van Dipartiment urbanistik, strom, kataster, grunttisch ont lòntzòmmhòlt va de autonome Provinz va Trea’t, der Gianluca Cepollaro, drauschauer va de Schual ver de Regiar van Lònt ont va de Lòntschòft va TSM | Step ont pet a lectio magistralis van Antonio De Rossi, learer van Politechnik va Torino ont toalnemmer van Bischòftkomitat TSM | Step. S ist gaben der pirgermoaster va de gamoa’ va Palai en Bersntol Franco Moar aa ver za griasn de toalnemmer.
Der kurs bill unterstitzn de kultur va de lòntschòft, bèrt gem en de aussicht, en de materialn ont en de technik, ont asou kennen zòmmhengen verschidena kompetenzn.
De toalnemmer, bail de untersuach en Bersntol en vraita as de 27 van leistagest, hom gameicht sechen de suach gamòcht va TSM as de tipische lòntumpau va Palai, pet de paispiln van virm za mòchen sa van ait, van auspaun sa ont bider prauchen sa, ont asou kennen der rif va de òrbet gamòcht van studentn van kurs va hoa u’lear van ENAIP as a toal paispil va pahalter. S hòt nèt valn gameicht de untersuach van Filzerhof en Vlarotz ver za derklorn va abia as augòngen ist der hoff en de bersntoler gamoa’schòft, a pahalter as haier vaiert de simhundert jor van sai’ pau. Der museum mòcht kennen de: etnografi, de gschicht de antropoligi ont de birtschòft.
De òndern trèffn barn kemmen gamòcht en Primiero as de viara van schanmikeal ont en Val di Rabbi as de òchta van schanmikeal, ver za studiarn de verschidena heff as de zboa lander. De u’lear bart envire gea’ as de vifzena van schanmikeal kan Mets va San Michele all’Adige ont as de viaraontzoa’sk van òlderhaileng ka Villazzano, en sitz van Enaip, as bart unterhòltn der rif van workshop as de sima van òlderhaileng 2024.
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
(cdt)
Immagini
