A bege boda åheft von bazzar von sea vo Lavòu zo riva aftn staige von fört boda dar Lino Zani, geholft vodar teknolodjì, kontàrt an kapìtl vodar stòrdja von groaz kriage boda, afta Zimbar Hoachebene hatt gelatt bichtege spurn.
Di Margherita anvétze iz gerift sin atz Lusérn ummaz von “Borghi più belli d’Italia”. Da hattma geredet vo bo ’z khinta her di zimbarzung un dena hattze augevånk zo giana nå in staige “Nå in tritt von sambinelo”, 7 km durch in beldar ume ’z lånt her, boda mearare skultùrn pitt holtz gedenkhan di protagonìstn von zimbarn stördjela. Spetar pittar hilfe  vo “spetzialege vüarar” izze gånt atz Sambastiå z’sega an tipischen hof gevüart vonar famildja boda hatt ’z gezügla von vich in pluat.
Gian Luca Gasca, boda khennt garècht di pèrng, hatt kontàrt  ’z Hörndle pitt alln soin khalkhöttane türm, haltantese au zo reda in hüttle Vigolana atz 2143 mètre höache zo vuazan in “Baible”, vo sèmm makma seng ummana von pestn auzseng aftn gåntz Trentino. Da hattar getroff di diarnen von prodjèkt CAI Eagle Team boda soin drumauz zuarzolega an khnopf djunge belese alpinìstn boda ’z djar 2025 bölln machan a speditziong in Patagonia.
Pittnåndar pitt soin tschell krablar kontàrnsa vodar soin pagaistarung un vo allz daz sèll boda iz mångl zo krabla.
Hèrta afta Zimbar Haochebene menglda sichar nèt begela un staigela zo macha pinn rat un, zo reda pròpio vo ditza, dar Gian Luca iz gånt nidar afte hoachebene vodar Vigolåna a platz pefèkt zo pedalara nidar un au atz staigela boda gian guat vor da gåntz famildja.
Dar toal iz khent hergerichtet ankunto dar arbat vo Trentino Marketing,  vodar Apt Alpe Cimbra, pittnåndar pinn CAI.

Übarsetzt von Schaltarle vor di zung von Toalkamou vodar Zimbar Hoachebene