“Billdo gian auz von haus un machandar a lem doi sèlbart, zalante 100 euro aftn månat? Un magare vennen an arbat o? Iz an intruam? Nò ’z iz bar! Nimm toal in auzschraibung "Coabitazione giovani" un mach machan an sprung doinar zukunft!” Asó hefta å di reklåm von prodjèkt boda bart khemmen gemacht in Kamòu vo Scurelle. Dar auzschraibung bart skadarn atz 30 von abrèl 2024.

Dar prodjèkt lekk vür zo nütza an quartìaro pitt acht khåmmarn aniaglana pitt soin bånjo un åndre plètz boma steat anvétze pittnåndar, boda hatt dar Kamòu vo Scurelle, quartìaro boda iz khent gètt zo zis åna z’zala in Öffentlesche Åmt vor Di Dianst in Laüt vodar Burge. Ditza Åmt hatt detzidart zo nütza in quartìaro vor disan naüng prodjèkt boda schützt da sotziàl nètz un di bichschaft von lånt nå in printzipio auzovülla un zo geba naügez lem in öffentleschen gehaüs boda nèt khemmen genützt. Di arbatn khemmen vürgevüart von Åmt vor da Sotziàl Pintom un von Åmt vor di Arbat vodar Autonome Provìntz vo Tria, von Kamòu vo Scurelle un von Öffentlesche Åmt vor Di Dianst in Laüt vodar Burge.

Dar prodjèkt hatt bol ’z zil auzohalta di djungen boden bölln machan a lem, ma in da gelaichege zait bölltma sterchran in sotziàl schatz pezzrante asó ’z lem vo alln in pürgar un nå pezzrante ’z lånt.
Berda nimp toal disan prodjèkt bart mochan machan sovl urn fraiböllege arbat, haltante kunt ke ditza mage nèt mengln in Trentino. Dar auzschraibung lekk vür defatte zen urn aftn månat fraiböllege arbat. Di djungen bartn mochan machan arbatn boda pezzarn ’z lem vo alln.

Darzuar zo haba an qartìaro zalante gåntz bintsche, di djungen bartn håm modo zo venna an arbat o pittar hilfe von Åmt vor di arbat boden bart helvan drinnzomachase un zo vorstìana baz da mang tüan.

ZO HABA MEARARE INFORMATZIONGEN:
Telefón: 0461/754123

e-mail info@apspborgo.it
www.trentinofamiglia.it

Übarsetzt von Schaltarle vor di zung von Toalkamou vodar Zimbar Hoachebene