In disa naüge editziong von Tagung bölltma untastraichan, nützante mearare struméntn, bazta iz drå vürzokhemma un alle di naüng sachandarn boda auvalln un boda ågian in lentar von pèrng, lentar boda in ta’vo haüt soin hèrta mindar gelebet un darzuar berdada lebet khint hèrta eltar, dar starch drukh von turismo un di kamöüschaft boda khemmen hèrta ermar, dar Tagung bill vorleng naüge idee un prodjèkte.

Durch teoresche studje un realege kase bartmase auhaltn zo reda vo bia di sachandarn soin gebèkslt dise djar, bia da soin drå zo bèksla haüt un aftz prodjèkte, stratedjìan un politike vor djar boda khemmen. ’Z bartnda nemmen ’z bort merare redar zbisen disan di Letizia Bindi (UNIMOL), di Federica Buffa (UNITN), dar Marco Bussone (UNCEM), di Federica Burini (UNIBG), dar Paolo Costa (FBK), dar Roberto Poli (UNITN), dar Annibale Salsa (TSM Step) un dar Pier Paolo Viazzo (UNITO).

Dar tagung bart soin inngerichtet in drai plenar sesiongen un åndre zboa aftz garadege tème: kultùr un auzseng, teritoriàl welfare, ekonomisch un turistìk entviklung.

Ma vorst zo vüara soine pensìarn, di vorlegom, bazta iz auvarkhent von soin nåsüach alln in studjös von fenomene boda ågian in lentar von pèrng un in nåsüachar, in profesionìstn un in policy maker boda arbatn zo geba vèrt in pèrng.

Di abstract un di poster mochan khemmen inngètt vor atz 26 von abrèl 2024 dena bartnsa khemmen geschètzt von bizzascht komitàtt von Tagung.

Bazta servìrt zo kandidarase mage khemmen abegenump vodar websait “Call for abstract e poster”, da bartar vennen o allz daz sèll boma mocht bizzan übar in Tagung.

Dar Tagung khint augelekk pittn schütz vo: autonome Provìntz vo Tria, Società dei Territorialisti/e onlus, tsm|step Scuola per il governo del territorio e del paesaggio e Unione Nazionale Comuni Comunità Enti Montani.

Übarsetzt von Schaltarle vor di zung von Toalkamou vodar Zimbar Hoachebene