L’opera, che la vegn fata su te un di lesc de coleament strategics logistics prinzipai de Fiem, la servirà per meter en doura l projet Bus Rapid Transit (BRT), sistem de trasport publich che raprejenta n miorament del sistem tradizionèl de Trasport Publich Local anter Trent – Fiem e Fascia de gra apontin a la creazion de neva operes infrastruturèles e tecnologiches, corsies resservèdes al trasport publich, compra de mesi neves e de maor fazion.

Aldò del studie de fatibilità lurà fora da Trentino Trasporti, l nef zenter intermodal de Ciavaleis che l vegnarà fat su te l’area Prà dei Tini l cognarà perveder:

    • un deposit per 15 corieres;
    • n piazal dai auti sot tera con a la leta 137 piac dai auti (de chi che 6 per i auti eletrics;
    • 16 posć per moto e 20 posć per la rodes);
    • na neva stazion de la corieres;
    • la infrastrutura per ciarièr la corieres eletriches;
    • servijes desche ofize per i biliec, sala da spet, bar.

I lurieres i cogn vegnir fac te 660 dis de seghit da la sotscrizion del verbal de consegna, perveduda dant che sie fora l 2023, e la fin di lurieres donca la é perveduda dant che sie fora l 2025, temp utol per la operes infrastruturèles coleèdes a la Olimpiades da d’Invern 2026.

L termin per portèr dant la perferides l é pervedù en vender ai 4 de aost del 2023 da mesdì.

Traduzion di Servijes Linguistics e Culturèi del Comun general de Fascia