Di trentinar pürgar boda bartn vången da naüge sanitér kart åna chip mang gian vür zo nütza da alt pinn chip sin atz 31 kristmånat 2023 asó azpemase hèrta hatt genützt siånka azta drau iz di datum geskadart.

Ditza zo geba zuar in pürgar zo giana vür zo maga håm di didjitàl dianst afte istitutzionàln portél vodar öffentleschen vüarom boda vorsan da didjital identitét. Azpe ma hatt sa khött, in Trentino soinsa mearar baz 18 tausankh di pürgar boda no nützan da sanitér kart pinn chip vor di dianst online. Di mearastn trentinar anvétze, obar di 220 tausankh, håm liabar nützan in sistèm Spid, boda mage khemmen genützt aftnan aniaglan computer, tablet odar smartphone. Da allz bazma mocht bizzan åzovorsa in Spid in Trentino: https://www.provincia.tn.it/Servizi/Richiedere-SPID.

Di didjital dianst gian å baispil di sanitét (vor in klinesche briaf), dar schual (innzoschraibase un vor in eletronesche redjister) in catasto, vor öffentlesche schütz, innzoschraibase atz konkorse, innzoschraibase aftz telematesche ordnung von firme, z’zala da öffentlesche vüarom. Azpe sa khött atz alle dise makma inngian saiz pittar sanitér kart pinn chip, saiz pinn Spid.

Bia zo vorlengra di zait vodar sanitér kart pinn chip boda iz geskadart(TS/CPS).  

Daz earst vo allz mochtma khön ke da alt kart geat vornaügart vorse skadart TS/CPS.

Bia zo tüana zo vorlengra di validitét vodar altn kart pinn chip venntmaz aftz disa websait: https://sistemats1.sanita.finanze.it/portale/elenco-driver-cittadini-modalita-accesso.

Balma sait inn in portàl, bartma mochan gian nå in sèll boda khint gevorst un izta mångl zo haba untar oage di passbörtar Pin un Puk vodar sanitér kart boda iz drumauz zo skadra. Di zboa koditzen soin khent gètt in mentsch balda iz khent ativart di kart  da earst bòtta, da mang però khemmen gevorst afte schaltarla von soin lånt boda arbatn nå dar asistentz. Da züntrest izta dar link boma mage gian z’sega boda soin alle di schaltarla vor ditza in Trentino.

Balma hatt getånt allz bazta khint gevorst, di pürgar mang lesan di kart pittnan lesar vo smart card. Dar Sistèm baldar hatt darkhennt in briaf gitt zuar zo vorlengra di validitét vodar kart sèlbart, ’z iz genumma drukhan aftz  “Rinnova”. Ma mocht darzuar ånemmen di informatìf afte privacy, balma innlekk di passbort Pin un Puk.

Verte zo redjìstrarase, da alt sanitér kart pinn chip (TS/CPS) bart mang khemmen genützt, lai vor di dianst online vodar öffentlesche vüarom sin in lest tage von djar boda khnt.

Da venntma di lånt schaltarla in Trentino:

https://www.provincia.tn.it/Servizi/Attivare-la-Carta-Provinciale-dei-Servizi-CPS.

Übarsetzt von Schaltarle vor di zung von Toalkamou vodar Zimbar Hoachebene
(Traduzione a cura dello Sportello linguistico della Magnifica Comunità degli Altipiani Cimbri)