Te chesta neva edizion l Convegn l se met dant de rejonèr, a na vida multidisciplinèra, de la tendenzes e de la inovazions che revèrda i raions da mont, da olache anchecondì la jent la se n va, olache la doventa scialdi più veia, se sent l peis del turism e la comunanza la doventa più pureta, per poder portèr dant de neva idees e projec.

Tras contribuc teorics e situazions de studie da portèr dant, vegnarà analisà tel detai i prozesc e la mudazions sozedudes tel passà, la dinamiches de anchecondì e projec, strategies e politiches per l davegnir. N lurier de enrescida a chel che tolarà pèrt sacotenc relatores desche Letizia Bindi (UNIMOL), Federica Buffa (UNITN), Marco Bussone (UNCEM), Federica Burini (UNIBG), Paolo Costa (FBK), Roberto Poli (UNITN), Annibale Salsa (TSM Step) e Pier Paolo Viazzo (UNITO).

L convegn l vegnarà metù a jir te trei sescions plenères e doi sescions paraleles de aprofondiment che tratarà chisc argomenc: cultura e paesaje, welfare teritorièl, svilup economich e turistich.

L envit a portèr l contribut personèl de reflescion, proponetes e ejic de enrescida l ge vegn fat a studiousc/es de fenomens coleé ai raions da mont, a enrescidores junior e senior, a profescionisć e profescionistes e a policy maker che se dèsc ju te la valorisazion di raions da mont.

Se podarà manèr ite i abstract e i poster dant dai 26 de oril del 2024 e i vegnrà valuté dal comitat scientifich del Convegn.

I materièi per la candidatura i é a la leta su la piata Call for abstract e poster, olache troarede duta la informazions che revèrda l Convegn.

L Convegn l vegn endrezà col patrozinie de: Provinzia autonoma de Trent, Sozietà di Teritorialisć/tes onlus, tsm/step Scola per l goern del teritorie e del paesaje e Union Nazionèla Comuns Comunitèdes Enc da mont.

Traduzion di Servijes Linguistics e Culturèi del Comun general de Fascia