[Ladino] Da les 13:43 de en domenia ai 3 de messèl del 2022, se à destacà l giacé de Ponta Rocia su la Marmolèda, a cajon de chel che l é mort undesc persones e ot l é stat i ferì, e l é n “sfrijon” sul giacé che se pel amò veder, ence se l é la neif. I momenc senestres, e soraldut la desgrazia che à tocià tant la families che la comunanza, i é stac recordé dal President de la Provinzia Autonoma de Trent canche l é stat orì i lurieres del Consei provinzièl de en mercol ai 3 de messèl. “L recort de n event dassen no pervedibol, che ge à fat dan no demò a la families toutes ite diretamenter, ma ence a duta la provinzia e a la Tèlia, l é vif amò anché te noscia memoria – coscita à dit l President Fugatti-. Anché, desche acà doi egn, noscia solidarietà la é forta co la families de la vitimes e con duc chi che à padì per via de chest event. Recordon con respet e recognoscenza, e jiron inant a lurèr dessema per renforzèr noscia resilienza per ge fèr front a evenc naturèi, per stravardèr noscia comunanza e tegnir sù l recort de chi che no l è più”.