L sit de l’Euregio no l dèsc demò informazions ai sentadins en cont de duta la neves de l’Euregio ma l ge fèsc cognoscer la ativitèdes de la cooperazion sorafora la seides de Tirol, Sudtirol e Trentin, i disc duc e trei i presidenc del Tirol, Provinzia autonoma de Busan e Provinzia autonoma de Trent.

Sul sit web, i sentadins i pel ruèr tel mond de l’Euregio e tor consaputa di sacotenc projec, scomenzadives, neves e evenc che vegn metù a jir. Estra apede, i video di viajes tras i trei raions de Tirol, Sudtirol e Trentin i envìa chi che ge vèrda a cognoscer l’Euregio en pruma persona. I video i tol ite jent o gropes de jent, ma ence lesc de l’Euregio, magnadives de la region tel format EuregioConGusto e fac de enteress con EuregioConcrete. Estra apede, sul nef sit web, l’é ence na mediateca che conta de l’Euregio.

Estra che i canai social media de l’Euregio (Facebook e Instagram), l sit web l’é l canal zentrèl de informazion e comunicazion de l’Euregio Tirol, Sudtirol, Trentin e na fontèna de informazions dintornvìa la cooperazion sorafora la seides.

L nef sit de l’Euregio sporc sacotenc highlights e vèlch una neva: l sit de la raprejentanza de l’Euregio a Bruxelles www.alpeuregio.org l’é stat metù ite tel nef sit www.euregio.info. La raprejentanza de Tirol, Sudtirol e Trentin a Bruxelles la é stata metuda sù del 1995 aldò de na cordanza anter i goerandores de la trei regions, che i à volù, a chesta vida, endrezèr via l prum ofize de coleament sorafora la seides a Bruxelles. Con anché i sentadins i podarà cognoscer dut de l’Euregio Tirol, Sudtirol, Trentin e su la raprejentanza a Bruxelles fajan demò n clic.

Traduzion di Servijes Linguistics e Culturèi del Comun general de Fascia
(Traduzione a cura dei Servizi Linguistici e culturali del Comun general de Fascia)