L numer vert l’é stat metù a jir ai 25 de firé del 2020, col scomenz de la pandemìa, e da aló inant se à seghità a ge dèr informazions a la jent, fora che endèna na curta paussa d’istà, responan a passa 200.000 telefonèdes. I operatores, enscin a 9 per turno, i respon amò a presciapech 1000 telefonèdes en dì. L’é zis aprijià l contribut di volontères de la Crousc Checena Talièna, che tras i sporc sie servije per ge responer a la domanes de la jent, coordené dal personal de la Zentrèla Unica de Emergenza de la Provinzia. Ades la domanes les revèrda soraldut i vazins, ma vegn fat domanes ence en cont de la limitazions coleèdes a la normes en doura, e vegn domanà informazions dintornvìa la carantenes, i tampons e sun chel che se cogn fèr canche se vegn de retorn da paìjes foresć.

Vegn recordà endò che l’800 867 388 l’é l numer vert Coronavirus che se pel chiamèr per aer informazions tecnich – sanitères sul virus Sars-Cov-2, sun provedimenc e ordinanzes, per canche se vegn de retorn, per i spostamenc, per la classificazion di raions, per i tampons, isolamenc e carantenes, ma ence per aer n didament per prenotèr l vazin. L 112, enveze, l’é l Numer Unich de Emergenza, da chiamèr demò se se à de besegn de aiut, per aer l didament di sanitères, di polins e di carabinieres o di studafech, e no per domanèr bele demò informazions.