Zimbar un möknar, asó azpe ’z ladinar o, soin toal vonan khopf zungen boda UNESCO khütt “in perikolo” (“Languages in danger”) nå in paråmetar boda disa organizatziong haltet kunt, daz earst: biavl redar ’z soinda un in bele kontèkste dise zungen khemmen genützt. Da khemmen khött ainfaich “zungmindarhaitn” nå in biavl da soin sèlln boda anvétze ren di zung mearar gekhennt in a Lånt odar in a redjong, ma vo “mindar” dise zungen håm nicht: da håm soi stòrdja, a sptzifege linguistìk struktùr un hintar håmsa alle a gåntza bèlt gemacht vo kultùr, traditziongen un a starchez gehöara bodase pintet, asó azpez iz vor aniaglana åndra zung geredet vo mildjü laüt o.

Darzuar mochtma nia vorgèzzan ke vor in Trentino di zungmindarhaitn soin dar grunt vodar spetzialege Autonomì un disar iz no an åndadar motìf zo haltase azpe a raichar schatz zo hüata azzar nèt gea vorlórt un zo schütza.

Di “Linee guida per la tutela e la valorizzazione delle lingue cimbra, ladina e mòchena in area dolomitica” boda soin auvarkhent vodar sotziolinguistìk untarsüach CLAM2021 (https://cimbro-ladino-mocheno-2021.lett.unitn.it/), untarsüach boda iz gånt z’sega un hatt geschètzt biavl dise zungen soin no starch un lente un hatt geholft zo lega au garadege prodjèkte zo schützase, khön ke ma mocht abelirnen hèrta mearar di maistre zo geba an istrutziong pitt mearare zungen un abezogeba in khindarn un in djungen di kompeténtzan boda soin mångl zoa azta dise zungen mang übarlem.

Haltante kunt vo disan kontèkst da autonome Provìntz vo Tria schützt di prodjèkte vor da hoach formatziong, boda ågian daz earst vo alln in maistre un alln in sèlln bodaz bölln khemmen, un boda dena håm in kompito abezogeba soine linguistìk un kulturàln kompetentzan in naüng djeneratziongen von lentar boda khint geredet daz zimbar, daz ladinar un daz möknar, un darzuar lirnenz in sèlln boda nia håm geredet a zung von zungmindarhaitn o: “di naüng redar”.

Ma mage nemmen toal in kurs azpe studjånt odar lai zo lüsna, ma khent zornìrn nå azma hatt gemacht verte di universitét odar, darzuar, azma hatt gearbatet übar di tème boda gian guat vor daz sèll boda dar kurs bill machan. Berda bill lai lüsnen hatt nèt mångl zo haba di titln boda khemmen gevorst.

Ma makse innschraim in kurs online vor di mittanacht von 28 von abrèl auzvüllante in formulàr boma vennt aftz disan link: www.unitn.it/corso_lingue_minoritarie

Dar kurs bartze haltn a toal in setz von Dipartimént vo Lettere un Filosofì vodar Universitét vo Tria in bege Tommaso Gar, 14 un a toal online, åhevante von 4 von madjo. An lestn verte dar kurs barta khemmen gètt, vor berda hatt abegètt di prüf, dar pefél boda sichart ke ma hatt gemacht in kurs.

Vor didaktike informatziongen:
Universitét vo Tria Dipertimént vo Lettere un Filosofì

Prof. Ermenegildo Bidese: ermenegildo.bidese@unitn.it
Prof.en Federica Ricci Garotti: f.riccigarotti@unitn.it

Link zo lesa in auzschraibung:https://event.unitn.it/minoranze-linguistiche/Bando_IALM_2023_24.pdf

Websait: https://event.unitn.it/minoranze-linguistiche/#corsi_e_seminari

Übarsetzt von Schaltarle vor di zung von Toalkamou vodar Zimbar Hoachebene