“Zòmmòrbet Gamoa'n Euregio” ist an projekt bou as mòchen toal mearer òrbetn as de inrrichtn van drai ourtn mòchen zòmm. Ver za schaung a toal projektn gamòcht ont de sèlln za mòchen zòmm en òlla de Gamoa'n van Euregio, ist kemmen gamòcht, no de Junta van GECT van pfinsta as de 29 van leistagst ka Sèn Jan/San Giovanni va Fassa, an trèff van presidetn van Schòftn van Gamoa'n van drai ourtn. En de glaich sitz van GECT, ver za giltn de òrbet van lokal innrichtn drinn en Euregio, ist kemmen u'ganommen der projekt va abia as barn kemmen gamòcht de tovln va guatkemmen en Euregio ver za versichern sèll as ist patschrim en de regln va iatn ourt, asou za derretn òlla de ausòndern dinger van sprochminderhait.
Der model van tovln kònnt guat gea' ver òll noat van Gamoa'n noch en plòtz bou as de kemmen galeik en ourt. No as de kemmen u'ganommen van provinzalamministrazionen, de gamoa'n barn meing leing de tovln.
Gor der doi projekt hòt tsechen de mitòrbet van Schòftn van Gamoa'n van Euregio, as hom galòk leing a tovl va guatkemmen, pet tschrim de zòmmòrbetn pet òndra lander as sai', en òlla de Gamoa'n as en 2021 hom pfrock.