Ufficio Stampa della Provincia autonoma di Trento

Lunedì, 05 Giugno 2023 - 16:10 Comunicato 1738

Traduzione in ladino
Geotrail, l viac interatif te la geologia de la Dolomites

Online l portal portà dant da la Fondazion Dolomiti Unesco. Tonina: “Fèr cognoscer l bel de chesta crepes e l’emportanza de les rencurèr”. L lurier de la rei di esperc coordenèda dal Trentin

Descorir la crepes patrimonie de l’umanità tras na esperienza interativa, che duc pel fèr. L é chel che vegn sport dal portal Dolomites World Heritage Geotrail, l strument - ades a la leta online – che dèsc l met de “lejer” a na vida scempia e multimedièla la geologia de la Dolomites te n viac tras i tempes geologics che ge à dat foja a chest teritorie fora de anter. Dut chest de gra al portal portà dant da la Fondazion Dolomiti Unesco, l ent de chel che la Provinzia autonoma de Trent la é sozio fondador. “L Geotrail – l à dit Mario Tonina, vizepresident e assessor al ambient de la Provinzia autonoma de Trent e che l fèsc ence pèrt del cda de la Fondazion – l é na scomenzadiva de gran emportanza per fèr cognoscer l bel del paesaje de la Dolomites e sia aspec de carater scientifich. N projet che vegn ca dal lurier envià via da la rei del Patrimonie Geologich, tel chèder de la Fondazion, che tol ite beleche vint esperc coordené dai tecnics de noscia Provinzia. Speron dassen –l à dit amò Tonina –che l portal posse vegnir durà e vijità da duc i sentadins. E che l ne dae l met de ge vardèr a nosc teritorie e de aprijièr amò de più sia gran valuta e ne didèr a l rencurèr. L strument l é a la leta de duc e ence di più joegn, che i é i protagonisć de la endesfides per stravardèr l patrimonie ambientèl” l à dit amò apede Tonina, che l à rengrazià duc chi che à lurà acioche chesta scomenzadiva de valuta la vegnisse fata con gran partezipazion.

I contegnui del Dolomites World Heritage Geotrail
L portal (https://dolomitesgeotrail.com/), a respet de la cater guides de papier dates fora ti egn passé, l sporc etres contegnui che dèsc n chèder più rich de la descrizion geologica del Patrimonie Mondièl. I percorsc che se pel fèr, leé un col auter, no l é demò chel tel spazie, do l vièl del Geotrail, e chel tel temp, do la linia cronologica; se pel ence ge jir do a percorsc tematics, che se pel arjonjer de gra a la fotos sferiches, tras la storia geologica, i mudamenc climatics, i evenc catastrofics.

L efet complessif sotrissea delvers la serialità del Ben Dolomites, ajache ogne picol toch de chel che vegn contà raprejenta na particolarità unica ma fondamentèla per les entener desche n ben unitèr e per aer azes a la storia de la Tera, che te la Dolomites la troa na sort de indesc.

N viac interatif de 300 milions de egn
L Dolomites World Heritage Geotrail donca l é na esperienza interativa a la descorida de la geologia de la Dolomites. I evenc entravegnui un do l auter ti ultimes 300 milions de egn à lascià na pedia tel crep e te la formes de chisc monc, e i li à fac doventèr n liber da marevea, dassen da lejer un vèrech do l auter. Ge dèr l met a duc de cognoscer la geologia l é ence n meso per sparpagnèr fora na vida de se emprevaler del Patrimonie Mondièl con manco prescia e più consaputa, dalonc dal turism spedient di gregn numeres, chiamà dal valor estetich de la Dolomites e pech vertech a entener la rejons fones de sia beleza.

I partner del projet
L portal l é nasciù da n lurier de grop deldut nef, che l à vedù la partezipazion de duc i teritories touc ite tel recognosciment de la Dolomites desche Patrimonie Mondièl col coordenament prezious de la Rei del Patrimonie Geologich de la Fondazion Dolomiti UNESCO. I partner istituzionèi del projet, do l orden alfabetich, l é l Dipartiment de Fisica e Scienzes de la Tera de l’Università de Ferara, l Dipartiment de Geoscienzes de l’Università de Pèdua, l MUSE – Museo de la Scienzes de Trent, l Parch Naturèl Adamello Brenta Geopark, l Servije ecologia de la Provinzia de Belun, l Servije geologich de la Provinzia autonoma de Trent, l Servije pianificazion del paesaje, del teritorie e strategica de la Region autonoma Friul – Venezia Giulia, la Sezion geologia de la Region del Venet e l’Ofize geologia e proes materièles de la Provinzia autonoma de Busan – Sudtirol.

La lingia di colaboradores che à lurà do chest projet la é a la leta tel detai a la direzion https://dolomitesgeotrail.com/credits-it/

Traduzion di Servijes Linguistics e Culturèi del Comun general de Fascia

(cdt)

Fonte: Ufficio Stampa

Versione Stampabile

Immagini

Visualizza

Potrebbero interessarti: