Garait, der nai vòssauto van Pompiarn: “Mear stòrch keing en vaier”
Der president Fugatti ont der asesor Gottardi: “Der sait a sicherkait ver de gamoa’schòft”
An nain mittl ver za leschn de vaiern. En somsta as de 29 van heibeger de gamoa’schòft va Garait hòt inngabichen der nai vòssauto van Vraibellegen pompiarn va Garait, regiart van komandant Vincenzo Laner bou as toalnemmen 21 pompiarn, an jungen ont zboa pompiarn aus dinst. “ Ber bissn as s doi tol ist mearer vert en de neat gaben, bail en Vaia ont bail s groas vaier vour a jor en Panarotta ont biavle as pfèrlech gaben ist ver de Pompiarn en de doin momentn” hòt er gadenkt der president va de autonome Provinz va Trea’t Maurizio Fugatti as toalganommen hòt en de innbaich en somsta nomitto as de Kamauz zòmm pet en asesor van lokaln dinstn Mattia Gottardi. “Leing derzua naia mittln, strumentn ont technologie ist a gamiaseta sòch ver de òllgamoa’ amministrazionen. S ist runt bichte gea’ envire za hèlven pet òlls sèll as praucht ont versichern de lòntschòft ont de òrbeter as miasn hilf gem” hòt er nou tsòk der president Fugatti, as hòt gadenkt as en an vèlt bou as de Autonomi van Trentin ist, de òrbet as de vraibelle tea’ hòt birkle goltbèrt: “De pompiarn sai’ a groasa familia as hèlven de gamoa’schòft: s ist der bèrt va de vraibellekait ont va de hilfekait ont s derstellt an bichtegen paispil ver de jungen as no kemmen”. Der asesor Gottardi hòt klòfft van “an moment za vaiern ver de gamoa’schòft va Garait ont ver en gònze Bersntol, sai’ a kuntschòft de pirgermoastern ont de vraibellegen van mearer Pompiarn as toalganommen hom en de innbaich”. Der asesor, propre bavai der glab as de vraibellekait runt bichte ist, hòt se padonkt pet de pompiarn ont pet de sai’na familie, bavai “sai’ an pompiar bill song innziachen en de neat ont en de mitthilf de baiber, de mander, de sèlln as zòmmlem, de mame ont de vater aa. Der hòt unterstraicht as kaven naia maschi’n ist nèt an “kost” ver de gamoa’schòft ober an investiment ver de sicherkait ont ver en lònt aa.
La nuova autobotte consegnata al Corpo dei Vigili del fuoco volontari di Frassilongo/Garait
Der nai vòssauto ist kemmen zuazolt pet en “Mearerjorplan ver za gem de paitrong en de vraibellega Pompiarn” ver 136 tausnt euro no an kost derkennt va 170 tausnt euro. Der auto ist kemmen herrgarichtet ver za prauchen en bail de vaiern ont der ist kemmen inntschrim en prochet van 2023 van Vaierleschmittldinst ont Zivilschutz.
En de innbaich sai’ aa gaben der vicepresident va de trentinische Federazione van Vraibellega pompiarn Luigi Maturi, der distrekt drauschauer Mauro Oberosler, de senatoren Elena Testor, der provinzalconsiliar Gianluca Cavada, der president va de Tolgamoa’schòft Hoa Valzegu’ ont Bersntol Andrea Fontanari ont der pirgermoaster va Garait Luca Puecher zòmm pet de lait van Bersntol. “ De enker bichte òrbet, iberhaup en de insern kloa’n derver, derstellt de kreft van a gamoa’schòft as zòmmhòltet, pet an grunt va vraibellekait, va zòmmschòft ont va zòmmhilf - hòt er tsòk der pirgermoaster Puecher -. Pet en doi nai vòssauto, s inser tol zòmm pet de Pompiarn van distrekt hòt mear kròft ont autonomi ver za gea’ enkeing an iata u’riaf”.
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
Nimm oar der service video > https://shorturl.at/afHI1
