Traduzione in cimbro
EUSALP: kompetentzan un möglichkait zo venna arbat afte pèrng vor di djungen zbisnen in earstn sachandarn vor in aktziong Khnopf 3
’Z iztase gehalte atz Scuol, in di Svaitz, an arbat trèff bodase soin gevuntet pittnåndar dar Executive Board EUSALP un di noün arbat khnöpf boda håm ågenump in arbat plån vor di drai djar 2023-2025 von aktziong khnopf 3 vo EUSALP “Markà vodar arbat, edukatziong, formatziong” koordinart vodar autonome Provìntz vo Tria durch in Dianst vor di zungmindarhaitn un européan audit.
Dar provintziàl asesór vor di istrutziong universitét un kultùr Mirko Bisesti, boda ’z djar 2022 iz khent delegart afte vorsitzarung EUSALP boda iz vürgevüart pittnåndar von zboa Provintzan vo Tria un Poatzan hatt gegünnt guata arbat alln in toalnemmar von Khnopf, hoffante azta di arbatn boda khemmen vürgelekk mang stercharn di mittarbat zbisnen in lentar boda soin toal vodar alpinar makrostratedjì, innvångante alle di sèlln boda håm eppaz bichte zo khöda – öffentleschen emtar, pürgar, firme un vor earst di djungen. Dar asesór hatt untarstricht bia bichte ’z soinda di sèlln aktziongen vürgetrakk zo geba mearar vèrt in soft skills haltante o kunt ke in madjo 2023 hatta ågeheft daz eauropéan djar vor di kompetentzan: "Di vürlegom zo venna an metodo zo darkhenna di trasversàln kompetentzan boma hatt augenump arbatante iz eppaz gåntz naügez, haltante kunt bia malamentar ’z iz zo vorstiana bazzez soin dise kompetentzan, bia ma darkhenntze un un bia ma mage soin sichar ke ummaz hattze, ombrómm siånka azta dise kompetentzan gian pittnåndar pinn sèlln profesionèlln un soin gruntlich zo maga inntretn aftna arbat khemmensa auzgehakht von sèll boda khint vürgetrakk ka schual. Pitt disarn sperimentatziong da alpinar Redjong mage soin a européan bèrkhstatt auzolega an nützlege sistèm zo darkhenna di trasversàln kompetentzan”.
Da duppl übargång – grümma un didjitàl - gitt naüge okasiongen z’arbata boda però vorsan naüge profesiongen un z’soina hèrta abegelirnt vo naügom. In disan kontèst dar Khnopf lekk vür zo rispundra in bazta bèkslt in di arbat afte pèrng schaugante nèt lai afte djungen, ma in arbatar mearar vür in di djar o, aulegante progrémm abezolirna di laüt auz un auz (life-long learning), nå dar sèlln boda iz di misiong von Khnopf “pezzarn in marka voda arbat, di istrutziong un abelirnen in strategesche sektör”. Di earstn arbatn zo macha soinz: gem mearar vèrt in sèll boma lirnt afte arbat; aunemmen un gem vèrt in trasversàln kompetentzan (di sèlln boda khemmen khött soft skills), saiz in lirnen saiz azpe profesiong; dar mångl zo dekha di diferéntz zbisnen bazta khint geopfart un bazta khint gevorst vor arbat in da alpinar redjong, helvante in djungen zo venna an arbat boden pazzt un in sèlln boda gem di arbat zo haba guate arbatar. Di sperimentatziong bartze kontzentràrn in drai bichtege sektör vor ünsarne lentar – bazta ågeat in gehültz, in geèzza un in turismo – zornìrt ombrómm da mang gem a groaza hilfe dar zirkolàr ekonomì. Dar Khnopf bil vürtrang zo nütza di naüng teknolodjìan abezolirna di arbatar, formatziong un arbat vo baitom ditza mage helvan azta di laüt gian nèt vort von lentar von pèrng.
Übarsetzt von Schaltarle vor di zung von Toalkamou vodar Zimbar Hoachebene
(cdt)
Immagini
