De vourtschbinnen as barn kemmen u’ganommen mechetn sai’ òrbetn van schualn, van vraischòftn, van privatn, ober s mechetn sai’ projektn u’pfònk va de birtschòftbèlt (bèrkn oder “start up”) ont istituzionen (Gamoa’n, Stòtt, Schòftn ont òndra dinstn). Zbischn de projektn vourstellt barn kemmen tschèrlt de pestn van an earste lokaltschèrl, as derno an iatz dorf bart vourstelln en a internazional praisgericht. De doi bart tschernen de pestn drai projektn ont de bart gem der prais as de 25 van schanmikeal 2024, bail der Zòmmtrèff van ARGE ALP Stòtt Viarer as bart se hòltn en Ticino. Der Trentin nimmp toal en internazional derkenn, as gip secks tausnt euro ver en earste prais, viar tausnt euro en zboate prais ont zboa tausnt euro en dritte prais.

Arge Alp ist an òrbetgamoa’schòft gagrunt as de 12 van schanmikeal 1972 ka Mösern en Tirol, pet en zil za stitzn de neat as enteressiarn ungefèr 26 milionen va lait. S sai’ toalnemmer va Arge Alp s Taitschlònt pet en Vraistòtt va Baiern, s Osteraich pet de Länder van Vorarlberg, van Tirol ont va Sòlzburg, s Baltschlònt pet de autonome Provinzn va Poazn ont va Trea’t ont de Region Lombardia, de Schbaiz pet de Kantonen van Grigioni, van San Gallen ont van Ticino.

Der bando ont de vrogtoalnemm kònnt men vinnen as de sait: https://www.argealp.org/it .

Ibersetz gamòcht van Sprochtirl va de Tolgamoa'schòft Hoa Valzegu' ont Bersntol